Atalǵan forým Talas aýdanynyń ortalyǵy Qarataý qalasynda da uıymdastyryldy. Aıtýly sharaǵa Talas topyraǵynan shyqqan elge belgili birqatar azamattar qatysty. Aýdan ákimi Qanatbek Mádibek el tanyǵan tulǵalardyń aýdannyń damýyna qosqan úlesiniń erekshe ekenin atap ótti. Al, belgili qalamger, oblystyq memlekettik arhıviniń dırektory Kósemáli Sáttibaıuly týǵan jerin kórkeıtýge qoldaý kórsetip júrgen azamattarǵa rızashylyǵyn bildirip, aýdan basshysyna Qarataý qalasynyń qaq ortasynda talaı jyldan beri qaraýsyz turǵan ǵımarattardyń máselesin sheship, halyq kádesine jaratýdy qolǵa alsańyz degen tilegin de jetkizdi.
Osy oraıda kásipker, Talas aýdanynyń qurmetti azamaty Dosan Rymtaev kóterilgen bastamany qoldaıtynyn aıtyp, jıyn barysynda ózi basqaratyn seriktestik menshigindegi ǵımarattyń biri – búginde qaraýsyz turǵan burynǵy «Qarataý» qonaqúıiniń ǵımaratyn halyqtyń ıgiligine tegin tartý etti. Tipti ony jóndeý jumystaryna da kómektesetinin aıtty. Kásipkerdiń aıtýynsha, ol atalǵan nysandy jaqynda ǵana 60 mln teńgege satpaı qoıypty. Odan da eldiń ıgiligi úshin ony tegin berýdi uıǵarǵan eken. «Qoly ashyqtyń – joly ashyq» deıdi halyq. D.Rymtaevtyń bul tosyn syıyna aýdan turǵyndary da rızashylyǵyn bildirýde. Shynynda da Qarataý qalasynyń ortalyǵyndaǵy bul ǵımarat bir kezde záýlim qonaqúı bolǵan. Keıin toqsanynshy jyldardaǵy qıyn kezeńde jekemenshikke ótip, qaraýsyz qalǵan. Al táýelsizdik jyldary Talas aýdanyn basqarǵan talaı basshy bul ǵımaratty memleket menshigine ala almaı ketken bolatyn. Biraq jurtshylyqpen júzdesýge kelgen kásipker jomarttyq tanytyp, ony el ıgiligi úshin tegin berdi. Aldaǵy ýaqytta burynǵy «Qarataý» qonaqúıiniń ǵımaraty kúrdeli jóndeýden ótkizilip, qalpyna keltiriletin bolady.
