Kelesi 1979 jyly KSRO-nyń Portýgalııadaǵy mádenıet kúnderi ótkizilip, onyń aıasynda sol jaqqa baratyndardyń tizimine «Moıynqum» ansambli de, erekshe senim bildirilip, engizilgen bolatyn. Al buǵan, árıne úlken daıyndyq kerek. Sondyqtan da ónerpazdardyń asa jaýapty saparǵa ázirligin Jambyl oblystyq partııa komıtetiniń ıdeologııalyq hatshysy Ǵaınıken Bıbatyrovanyń ózi (qazir Almaty qalasynda turady) tikeleı qadaǵalap otyrdy. Sol sııaqty marqumdar – aýpartkomnyń birinshi hatshysy Aıtbaı Nazarbekov pen úshinshi hatshysy Jumabek Orynbaev ekeýi árdaıym aýyl ártisteriniń osy oraıdaǵy árbir áreketine erekshe nazar aýdardy. Tipti ónerpazdardyń sheberligin shyńdaý úshin sol kezdegi astanamyz Almaty qalasynan arnaıy mamandar da shaqyryldy.
Sonymen alystaǵy Portýgalııada ózge de áriptesterimen moıynqumdyqtar bir aıdaı boldy, onyń ishinde bas qalasy Lıssabon men Madeıra araly bar, 12 konsert qoıyp, aıdy aspanǵa bir-aq shyǵardy. Qyzý qandy portýgaldyqtar kók júzinde qalyqtaı ushqan ózderine tańsyq ózgeshe sıpattaǵy tamasha qazaq án-áýenderin tapjylmaı otyryp tyńdady, myń buralǵan bıshi qyzdardyń kózdi tartyp, kóńildi kóriktendirgen ónerine súısine qol soqty. Iá, sonda Zınakúl Qaımaqova, Rysqulbek Esbergenov, Elmıra Muqasheva, Tursyn Meıirqulov, Muqan Sartov, Tórehan Nurmanbaev, Ǵalym Seıilhanov, Qyrǵyz Zaıyrqulov, Turar Berdiqojaev, Satylǵan Túıebaev, Aısulý Rsaldıeva jáne t.b. moıynqumdyqtardyń ónerine sheteldikter ystyq yqylasyn tanytqany anyq.
Bul saparǵa ansambldi obkom hatshysy Ǵ.Bıbatyrova men aýpartkom hatshysy J.Orynbaev bastap baryp edi. Endi «Pravda» gazeti «Bravo, Moıynkým!» atty maqala shyǵardy.
Myna sýrette sol Portýgalııa saparynan bir kórinis beınelengen. Ansambl músheleriniń birazy ǵımaratqa ilingen ózderiniń afıshasynyń janynda tur. Sol jaq shettegi muǵalim, myqty dombyrashy Abashhan Kólbaev, al oń jaqtan birinshi turǵan kóptegen ádemi ánniń avtory, Qazaqstan Kompozıtorlar odaǵynyń múshesi, búginde 76 jastaǵy Sadyq Qunanbaev. Shynymyzdy aıtsaq, ortadaǵy tórteýdi anyqtaýǵa múmkindik bolmady...
Aıtqandaı,1980 jyly Máskeý olımpıadasy bolyp edi ǵoı. Afıshadan onyń sımvoly – aıýdyń qonjyǵy Mıshkanyń da beınesimen mundalaıdy.
