Táýelsizdiktiń 30 jyldyǵyna arlnalǵan baıqaýdy QR Ekologııa, geologııa jáne tabıǵı resýrstar mınıstrligi 2021 jyldyń 1 aqpany men 15 sáýiri aralyǵynda «National Geographic Qazaqstan» jýrnal redaksııasymen birge ótkizgen.
Dodanyń basty maqsaty - adam men tabıǵattyń ózara árekettesý máselelerine qoǵam nazaryn aýdarý, tabıǵı alýantúrlilikti saqtaý jáne qorshaǵan ortaǵa degen qurmet ıdeıasyn keńinen nasıhattaý. Uıymdastyrýshylardyń sózinshe, qoǵamdaǵy janýarlarǵa degen qatygezdiktiń aldyn alý men janashyrlyq, ósimdikter álemine uqypty qaraý ıdeıalaryn óner týyndylary arqyly da keńinen taratý qajet.
«Baıqaýǵa arnalǵan saıtta 782 adam tirkelip, 1515 sýret saıysqa tústi. Fotobaıqaýǵa túsken sýretterdiń basym kópshiligi kompozısııalyq turǵydan ádemi bolǵandyqtan qazylar alqasynyń aldynda úlken jaýapkershilik pen qıyn tańdaý turdy. Jalpy, ekologııalyq aǵartýshylyq, ekologııalyq sanany kóterý jumysynyń bir bóligi retinde osy baıqaýdy Táýelsizdiktiń 30 jyldyǵy merekesine arnap mınıstrliktiń qoldaýymen birinshi ret uıymdastyryp otyrmyz. Aımaqtardaǵy ekologııa, janýarlar álemi problemalaryn osyndaı fotosýretter arqyly kórsetýdi maqsat tuttyq»»,- deıdi «National Geographic Qazaqstan» jýrnalynyń bas redaktory Erkin Jaqypov.
Úsh kezeńnen turǵan baǵalaýdan keıin qazylar alqasy 4 nomınasııa boıynsha jeńimpazdardy anyqtady:
- Makroálem – Aleksandr Vlasıýk, «Melolontha»;
- Anasy men balasy – Farhat Kabdykaırov, «Bábisek balapanyn tamaqtandyrý»;
- Qazaqstan peızajdary – Ernur Manaphan, «HAN TÁŃIRI»;
- Qazaqstan jan-janýary – Pavel Mıheev, «Sopernık».
Sondaı-aq, «Týranga Grýpp» kompanııasy atynan «Aıýsaı» nomınasııasyn «Egemen Qazaqstan» respýblıkalyq gazetiniń fototilshisi Erlan Omar ıelendi. Ile-Alataý parkindegi áıgili shatqaldyń atymen atalǵan nomınasııa ulttyq parkterdiń tabıǵatyn sheber beınelegen qatysýshylarǵa usynylady.
Otandyq áýesqoı jáne professıonal fotograftar arasyndaǵy baıqaýdyń ár nomınasııanyń jeńimpazyna 300 000 teńge júldeqory taǵaıyndaldy.
Jeńimpazdardyń jumysy www.photocontest.kz saıtynyń, «Jeńimpazdar» bóliminde jarııalandy.
Jarysqa túsken barlyq sýretti saıt galereıasynan tabýǵa bolady.
