Eske alý jıyny barysynda 1921 jyldan 1954 jylǵa deıingi jappaı saıası qýǵyn-súrgin kezinde tek Qostanaı oblysynyń ózinde 7 myń adam qýdalanyp, olardyń eki myńnan astamy atylǵany týraly aıtyldy. Sondaı-aq qýǵyn-súrgin jyldary ata-anasynan aıyrylǵan balalardyń taǵdyry týraly áńgime órbidi.
Qostanaı qalasynyń turǵyny Vera Kojýhovskaıanyń aıtýynsha, 1936 jyly Qostanaı oblysyna polıak ultynyń ókilderi jer aýdarylyp kelgen. Vera Fedorovnanyń atalary Meńdiqara aýdanyna turaqtap qalypty.
«Meniń ájemdi kámeletke tolmaǵan balalarmen birge mádenıet úıiniń ǵımaratyna ornalastyrypty. Úreı bılep alǵan balalar alǵash bul jerdi bótensinip, úırene almapty. Biraq qıyn-qystaý kezeńde bir japyraq nanymen bólisip, qamqorlyq tanytqan jergilikti halyqtyń keń peıiliniń arqasynda osy ólkege birjola turaqtap, sińisip ketti», dedi Vera Kojýhovskaıa.
Mıtıngige jınalǵandar memorıaldyq eskertkishke gúl shoqtaryn qoıyp, bir sáttik únsizdik jarııalap, saıası qýǵyn-súrgin qurbandarynyń rýhyna taǵzym etti.
