Qalanyń ekologııalyq ahýalyna alańdaıtyn turǵyndar qoıý qara tútindi, zańsyz qoqys oryndaryn jáne taǵy basqa keleńsiz jaıttardy sýret pen beınege túsirip, ekologııa departamentine joldaýdy, áleýmettik jelilerge júkteýdi dástúrge aınaldyrǵan.
Sala mamandary sol dálelderdiń negizinde josparsyz tekseris ótkizýge quqyly. Oblystyq ekologııa departamentiniń basshysy Ilııas Quramysovtyń sózinshe, sondaı shaǵymdardyń negizinde iri sút óńdeýshilerdiń biri – «Molkom-Pavlodar» JShS-ne eskertý jasalyp, 3,5 mln teńge kóleminde aıyppul salyndy.
«Departamenttiń synaq zerthanasy qazandyqta tıisti ólshemderdi júrgizip, aýany lastaıtyn zattardyń kólemi normadan asqanyn kórsetti», deıdi I.Quramysov.
Sol sııaqty «Qazavtojol» JShS qazandyǵynyń shań men kómirsýtek dıoksıdin shamadan tys shyǵaratyny anyqtaldy.
«Maıkóben-Vest» kómir kenishi de emıssııa kólemin tıisti normadan asyrdy. Jalpy, jyl basynan beri qorshaǵan ortany qorǵaýǵa qatysty zańdy tulǵalardan 100-den astam jáne turǵyndardan 27 shaǵym tústi.
Sonyń nátıjesinde 54 zańbuzýshylyq anyqtalyp, kásiporyndarǵa 65 mln teńge kóleminde aıyppul salyndy. Shyǵyn kólemi 4 mln teńge bolatyn taǵy 13 is boıynsha materıaldar ákimshilik sotqa joldandy.
