Qazaqstanda koronavırýstyń taralýyna jol bermeý jónindegi vedomstvoaralyq komıssııanyń 2021 jylǵy 28 mamyrdaǵy sheshimine sáıkes Qazaqstan men Polsha arasyndaǵy turaqty áýe qatynasy qaıta qalpyna keltiriledi.
«10 maýsymnan bastap Varshava jáne Nur-Sultan qalalary arasyndaǵy reıster aptasyna 1 ret jıiligimen «LOT Polish Airlines« polıak áýe kompanııasymen qaıta jańǵyrtylady dep josparlanyp otyr.
Varshava – Nur-Sultan – Varshava alǵashqy reısi osy jyldyń 10 maýsymynda oryndalady.
Budan ári eki memlekettiń astanalary arasyndaǵy reıster dúısenbi saıyn B – 737 tıpti áýe kemesinde oryndalatyn bolady», delingen habarlamada. Qazaqstan men Polsha arasyndaǵy reısterdiń odan ári ulǵaıýy epıdemıologııalyq jaǵdaıǵa jáne vedomstvoaralyq komıssııanyń tıisti sheshimderine baılanysty bolady.
Reıster sanıtarlyq-epıdemıologııalyq talaptardy qatań saqtaı otyryp jáne áýekompanııa saıtynda jarııalanǵan kestege sáıkes jasalady.
