Instagram áleýmettik jelisindegi pablıkterdiń birinde demalys kúni Vatyrmall saýda-oıyn-saýyq ortalyǵynyń janynda kózge túsip qalǵan qyzmettik kóliktiń sýreti paıda boldy.
«Memlekettik qyzmetshilerge qyzmettik kólikti jeke maqsatta paıdalanýǵa tyıym salynady! Mundaı zań buzýshylyqtarǵa nazar aýdarǵan durys!», dep jazady jeli qoldanýshylarynyń biri.
Endi biri «Adamdar qalaı túsinbeıdi?! Ol bizdiń esebimizden, biz tólegen salyqtardyń arqasynda kólikpen qydyryp júr», degen pikir qaldyrǵan.
Alaıda olardyń arasynda «Onda turǵan ne bar? Ol da adam emes pe?» degen qoldaýshylardy da kórýge bolady.
Bul jaǵdaıǵa qatysty Maı aýdanynyń ákimdigi túsinik berdi.
«Bıylǵy jylǵy 6 maýsymda Maı aýdanynyń ákimi qyzmettik kólikte áleýetti ınvestor «Aport Mall» JShS-niń ókilimen iskerlik kezdesýge Pavlodar qalasyna shyqty. Bul ınvestısııalyq dırektordyń ókilimen kezdesý bolatyn. Kezdesýde sýarý jáne mal sharýashylyǵyn damytý máseleleri talqylandy. Aldaǵy ýaqytta osy jobany iske asyrý aýdannyń áleýmettik-ekonomıkalyq damýyna oń áserin tıgizedi. Kezdesý basqa jerde boldy. Vatyrmall-ǵa keri qaıtar jolda sý alý úshin soqtyq», deıdi aýdan ákimi Marat Aqtaev.
