Olımpıadalar men jarystardyń qorytyndysy boıynsha júldegerler men jeńimpazdarǵa tıisti dıplomdar, qatysýshylarǵa sertıfıkattar tegin beriledi. Bul yntalandyrý maqsatynda jasalady.
«Sonymen qatar bilim berý qyzmetteri naryǵynda jeke uıymdar jumys isteıdi, olar balalarǵa, mektepterge, muǵalimderge, ata-analarǵa ártúrli aqparat kózderi arqyly óz qyzmetterin usynady. Bul qyzmet kórsetý salasy lısenzııalanbaıdy, QR BǴM tarapynan resmı ruqsattardy talap etpeıdi. Olardyń qyzmetteri aqyly, olarǵa qatysý úshin ata-analar óz qarajattaryn salady nemese basqa kózder tartylady. Aıta keteıik, bul jarystardyń deńgeıi ár túrli, olardyń ishinde óte nashar uıymdastyrylatynyn muǵalimder de, mektepter de, ata-analar da aıtady. Sonymen qatar balalardy damytý turǵysynan qyzyqty jáne tanymdyq olımpıadalar da joq emes. Kóbinese bul uıymdar olımpıadalardyń ataýyn mınıstrliktiń olımpıadalarynyń tizbesindegideı etip alady. Biraq Bilim jáne ǵylym mınıstrliginiń bul aqyly jarystarǵa eshqandaı qatysy joq. Sondyqtan balalar men olardyń ata-analary, muǵalimder men mektepter ártúrli olımpıadalar men konkýrstarǵa balalardyń qatysýyn tańdaǵanda muqııat bolýy kerek. О́z qarjy qarajatyn jumsamas buryn, uıymdastyrýshynyń kim ekenin, balalardy damytýda qandaı tájirıbesi bar, balalardyń olarǵa ne úshin qatysýy, qandaı da bir konkýrs nemese olımpıada oqýshynyń damýyna ne beretinin, olardyń qandaı daǵdylar men quzyretterdi damytatynyn jáne t.b. anyqtaý qajet», dep eskertti vıse-mınıstr.
Bilim jáne ǵylym mınıstrligi ótkizetin zııatkerlik olımpıadalar men konkýrstardy «Daryn» respýblıkalyq ortalyǵy, shyǵarmashylyq jáne kórkemdik baǵyttardy Respýblıkalyq qosymsha bilim berý ortalyǵy, sporttyq baǵyttardy Respýblıkalyq dene shynyqtyrý jáne sport ortalyǵy úılestiredi.
Jalpy, olımpıadalar men baıqaýlarǵa qatysý erikti túrde júrgiziledi. Ár ata-ananyń ózi balasynyń aqyly jarystarǵa qatysýyn nemese qatyspaýyn ózi anyqtaıdy. Bul rette muǵalimderdiń de, mektep ákimshilikteriniń de, ádistemelik qyzmetterdiń de aqyly is-sharalardy uıymdastyrýǵa, aqyly túrde qatysýǵa májbúrleýge quqyǵy joq. Eger májbúrleý faktileri bolsa, bilim berý sapasyn qamtamasyz etý Komıtetiniń aýmaqtyq departamentterine júginý qajet.
