Qazaqtyń kúı ónerinde Qurmanǵazy, Dáýletkereı sekildi ulylardyń sara jolyn jalǵap, ózi de tuǵyrly tulǵaǵa aınalǵan Qarshyǵa aǵamyzdyń orny bólek. Jasynan ákesiniń tálimin alyp, on saýsaǵynan óner tamǵan kúıshi bala atanǵan ony Qurmanǵazy orkestrine Nurahmet Jorabekov jetektep alyp kelgen. Ol osy orkestrde qyzmet isteı júrip, konservatorııanyń halyq aspaptary fakýltetin támamdaıdy. 1973 jyldan kúı atasy atyndaǵy orkestrdiń bas dombyrashysy, 1988-1991 jyldary orkestr dırıjeri boldy. 1991 jyldan Qurmanǵazy konservatorııasynda dombyra kafedrasynyń meńgerýshisi bolyp, shákirt tárbıeledi. Ulǵatty ustazdyq qyzmetimen birge, Qurmanǵazy, Dáýletkereı, Mahambet, Dına Núrpeıisova jáne t.b. kúıshilerdiń shyǵarmalaryn notaǵa túsirip, talaı ǵasyr urpaq kádesine jaraıtyn mura qaldyrdy.
Ataqty kúıshige arnalǵan mazmundy is-shara Qarshyǵa aǵamyzdyń Almatydaǵy ózi turǵan úıine eskertkish taqtanyń qoıylýymen bastaldy. Oǵan Mádenıet jáne sport vıse-mınıstri Nurǵısa Dáýeshov, Almaty qalasy Mádenıet basqarmasynyń basshysy Ǵanı Maılybaev, Qurmanǵazy orkestriniń dırektory Medet Qýanyshev, Qurmanǵazy atyndaǵy
konservatorııa rektory Arman Júdebaev qatysyp, talantty tulǵanyń adamı bolmysy men óneri týraly estelikterimen bólisti.
Odan keıin taǵylymdy kesh Qarshyǵa aǵamyz 25 jyl qyzmet istegen Qurmanǵazy atyndaǵy Qazaq ulttyq halyq aspaptary orkestriniń konsertine ulasty. Aldymen munda Mádenıet jáne sport mınıstri Aqtoty Raıymqulovanyń quttyqtaýy oqyldy. Kesh barysynda dańqty kúıshiniń «Kúı uran», «Aq qaıyń», «Jer Ana», «Arpalys», «Juldyzym» jáne t.b biregeı týyndylary oryndalyp, jınalǵandar ardaqty azamattyń asyl murasymen taǵy bir qaýyshyp, áserli kóńil kúıge bólendi.
Sonymen birge jurtshylyq kesh aıasynda Qarshyǵa Ahmedııarovtyń ónegeli ómirinen syr shertetin sýretteri men kúıshiniń jeke tutynǵan buıymdary, qasıetti qara dombyrasy jáne memlekettik marapattary qoıylǵan kórmeni tamashalady.
