Oblystyq PD baspasóz qyzmetiniń málimetinshe, JShS esepshisi fırmanyń qarajatyn otbasylyq qajettilikke jumsaǵan. Onyń mindetine býhgalterlik qujattardy oryndaý, taýarlarǵa tapsyrys berý, taýarlarǵa aqy tóleý, qyzmetkerlerge jalaqy esepteý kiredi.
«Ol aı saıyn fırmanyń 300-400 myń teńge kólemindegi aqshalaı qarajatyn kúıeýine tıesili kartochkalyq shotqa aýdarǵan jáne kartany ózi paıdalanǵan. Al basshylyqqa jalǵan shot-faktýralar usynǵan.
Atalǵan fakti boıynsha QR QK 189-baby, 3-bóligine sáıkes sotqa deıingi tergeý júrgizilýde», dedi polısııa departamenti bastyǵynyń tergeý jónindegi orynbasary Rashad О́teýov.
Taldaý qortyndysyna súıensek, kóp jaǵdaıda qylmystyq quqyq buzýshylyqtyń bul túrin kassırler, býhgalterler, qoıma meńgerýshileri, dúken satýshylary, ekspedıtorlar, sarapshy baǵalaýshylar jasaıdy. Basshylyq uzaq ýaqyt boıy aýdıt júrgizbeıdi, óıtkeni olar jumysshylardyń adaldyǵyna senim artady. Degenmen, keı jaǵdaıda qolastyndaǵy jumysshylary úmitti aqtamaıdy.
«Senip tapsyrylǵan bóten múlikti ıemdený nemese ysyrap etkeni úshin Qazaqstan Respýblıkasy Qylmystyq kodeksiniń 189-baby boıynsha qylmystyq jaýapkershilik kózdelgen. Polısııa kásip ıelerine óz kásiporyndarynda, fırmalarynda mezgil-mezgil túgendeý men aýdıt júrgizýge keńes beredi. Sondaı-aq taýarlar men materıaldardy saqtaý oryndarynynda beınekameralar ornatqan durys», deıdi Rashad О́teýov.
Aıta keterligi, jyl basynan beri polısııada bóten múlikti talan-tarajǵa salýdyń 29 faktisi tirkelgen.
