Is-shara «Astana jastary» jastar resýrstyq ortalyǵy jáne Saraıshyq aýdany ákimdigimen birlesip uıymdastyryldy. Atalǵan ortalyq quramyndaǵy Eriktiler qozǵalysyn damytý bólimi 2014 jyldan beri jumys istep keledi. Qazirgi tańda mekemede 8000-nan astam erikti qyzmet atqarady.
«Búgin 15 naýryz – Qaıyrymdylyq jasaý kúni, bul kún meıirimdilik pen tatý ómir súrýge, beıbitshilikke shaqyrady. Negizgi maqsat – eńbek adamdaryna adal eńbekteri úshin rahmet aıtý, kishkene bolsa da kóńilderin kóterý», deıdi Eriktiler qozǵalysyn damytý bóliminiń bas mamany Aızat Alı.
Aksııa aıasynda eriktiler kommýnaldyq qyzmet jumysshylaryn ystyq baýyrsaq pen shaıdan dám tatqyzdy. Sonymen qatar eriktiler kúrek alyp, aýmaqty tazalaýǵa atsalysty.
Naýryznama: búgin – qaıyrymdylyq jasaıtyn kún
«Men osy salada 10 jyldan beri jumys isteımin. Bizge eriktiler árdaıym qoldaý kórsetedi. Olar múmkindiginshe qolǵabys kórsetip, táttiler taratyp, yqylastaryn bildiredi. Mundaı sharalar bizge qýanysh syılaıdy jáne eńbegimizdi baǵalaıtyn adamdardyń baryn sezdiredi», deıdi «Selına Servıs» kommýnaldyq qyzmetiniń qyzmetkeri Dınara Qalıeva.
Uıymdastyrýshylardyń aıtýynsha, mundaı bastamalar qoǵamda meıirimdilik pen ózara qoldaý mádenıetin qalyptastyrýǵa, sondaı-aq qarapaıym eńbek adamdaryna qurmet kórsetýge baǵyttalǵan. Eriktiler aldaǵy ýaqytta da osyndaı áleýmettik mańyzy bar sharalardy turaqty túrde ótkizip, qoǵamǵa paıdaly isterdi jalǵastyra bermek.
