Olımpıadanyń fınaldyq kezeńi testilik, mýltımedıalyq jáne dalalyq tapsyrmalary bar eki kezeńnen turdy. Bul jarystyń tájirıbelik máni men pánaralyq sıpatyn kúsheıtedi. Dalalyq kezeńniń jarysy bastalmas buryn qatysýshylar «Taza Qazaqstan» jobasynyń aıasynda Astanadaǵy «Kóktal» saıabaǵyna kóshet otyrǵyzdy. Osylaısha, olımpıadanyń tárbıelik sıpaty da kúsheıe tústi.
Búginde geografııa ǵylymy qarqyndy damyp, aýqymy keńeıip kele jatqan salalardyń birine aınaldy. Ol jer bederi men Jer betiniń qurylymyn, tabıǵatty, elderdiń aýmaǵyn zertteıtin dástúrli ǵylym ǵana emes, sonymen qatar ǵaryshtyq geografııa sekildi jańa baǵyttardy da qamtıdy. Osyǵan baılanysty álemde geografııany oqytýdyń mańyzy men ózektiligi kúnnen kúnge artyp keledi. Bul pán oqýshylardyń tanymdyq kókjıegin keńeıtetin kóptegen málimet usynyp, ǵylymı zertteýlerge degen qyzyǵýshylyqty oıatady.
EcoForming qorynyń basshysy Qanat Abashov: «Ulttyq olımpıadany ótkizýdegi basty maqsat – oqýshylardyń geografııa pánine degen qyzyǵýshylyǵy men yntasyn arttyrý, sondaı-aq geografııanyń pán retindegi máni men mańyzyn nasıhattaý», dep jobanyń mańyzyn túsindirdi. Olımpıadaǵa qatysý jasóspirimderdiń zertteý mashyǵyn damytyp, bilimin tereńdetýge múmkindik beredi.
Uıymdastyrýshylardyń aıtýynsha, Geo Star olımpıadasy bıyl aıtarlyqtaı ósim kórsetip, qatysýshylar sany eki ese artqan. Bul oqýshylardyń pánge degen qyzyǵýshylyǵynyń artqanyn aıǵaqtaıdy.
Geo Star Ulttyq geografııa olımpıadasy aıasynda qatysýshylar arasynda aǵylshyn tilinde arnaıy týr uıymdastyrylady. Onyń jeńimpazy jyl saıyn Taılandta ótetin International Asian Championships uıymynyń Azııa boıynsha geografııa chempıonatynda Qazaqstannyń namysyn qorǵaý múmkindigine ıe bolady.
Byltyr atalǵan chempıonatta Qazaqstan atynan Almaty qalasynyń 8-synyp oqýshysy Erik Erlan qatysyp, 90-nan astam qatysýshynyń arasynda 14-oryn ıelendi. Bıyl mundaı joldama astanalyq oqýshy Qalı Nursultanǵa buıyrdy.
Nursultannyń ózi bıylǵy jarys básekege toly ótkenin aıtady. Qarsylastarynyń daıyndyǵy joǵary bolǵan.
«Byltyr osy jarysta 2-oryn ıelengen edim, bıyl 3-oryn aldym. Degenmen aǵylshyn tilindegi arnaıy týrda jeńimpaz atanǵanymdy estigende, qatty tańyrqadym ári erekshe qýandym. Osy olımpıadaǵa talaı ýaqyttan beri daıyndalǵan edim», deıdi Nursultan.
Aıta ketý kerek, olımpıada Respýblıkalyq ǵylymı-praktıkalyq «Daryn» ortalyǵynyń, daryndy balalar men talantty jastardy anyqtaý jáne qoldaý ortalyǵy – «Astana daryny» uıymynyń ádistemelik qoldaýymen, Chevron kompanııasynyń demeýshiligimen, sondaı-aq National Geographic Qazaqstan jýrnaly redaksııasynyń kontenttik qoldaýymen ótkizildi.
