Jobaǵa Qazaqstannyń barlyq óńirinen 400-ge jýyq pedagog qatysty. Olar buǵan deıin 400 myńǵa jýyq muǵalimdi qamtyǵan «Bilim berýdegi jasandy ıntellekt: ınnovasııalyq tehnologııalar men oqý úderisiniń sıfrlyq transformasııasy» respýblıkalyq onlaın kýrsyn aıaqtap, irikteýden ótken mamandar qatarynan jınalǵan.
Hakaton barysynda qatysýshylar jasandy ıntellektini oqý prosesine engizý, bilim berý kontentin ázirleý, baǵalaý júıesin avtomattandyrý, jekelendirilgen oqytý modelin qurý jáne mektep menedjmentin jetildirý baǵyttarynda jobalar ázirledi. Uıymdastyrýshylardyń aıtýynsha usynylǵan sheshimder naqty mektep tájirıbesine beıimdelgen praktıkalyq modelder retinde baǵalanǵan. Bul rette «Daryn Ustaz» ortalyǵynyń jetekshisi Asqar Maqsat pedagogterdiń halyqaralyq tájirıbe almasý múmkindigine toqtaldy. Onyń aıtýynsha úzdik 20 pedagog Ońtústik Koreıada taǵylymdamadan ótip, jasandy ıntellektini bilim berý júıesine engizýdiń ozyq úlgilerimen tanysady.
«Hakaton qorytyndysy boıynsha úzdik 20 pedagog «Daryn Ustaz» ortalyǵy qarajaty esebinen Ońtústik Koreıaǵa jiberiledi. Bul el jasandy ıntellekt tehnologııalaryn orta bilim berý júıesine tıimdi engizgen jetekshi memleketterdiń biri. Pedagogterimiz I-Scream Media sııaqty iri tehnologııalyq kompanııalardyń tájirıbesin zerdelep, jasandy ıntellekt sheshimderiniń mektep júıesine naqty qalaı engizilip jatqanyn kóre alady», dedi ol.
Qatysýshylardyń aıtýynsha hakatonnyń eń qundy tusy ár óńirden kelgen muǵalimderdiń qysqa ýaqytta bir komandaǵa birigip ortaq joba ázirleýi.
«Eń aldymen uıymdastyrýshylarǵa alǵysymdy bildiremin. Biz kelgen sátten bastap jan-jaqty qoldaý kórsetildi. Bizdiń topta ár óńirden kelgen bes pedagog boldy. Buryn bir-birimizdi tanymaıtynbyz, soǵan qaramastan az ýaqyt ishinde tez til tabysyp, birlesip jumys istedik», deıdi qatysýshylardyń biri.
Onyń aıtýynsha olardyń jobasy jasandy ıntellekt negizindegi adaptıvti bilim berý platformasyn qurýǵa baǵyttalǵan. Bul júıe oqýshynyń bilim deńgeıin anyqtap, soǵan sáıkes jeke tapsyrmalar usynýǵa múmkindik beredi.
Jeńimpazdardyń pikirinshe, marapat jarııalanǵan sáttegi qýanyshty emosııany sózben jetkizý múmkin emes. Olar bul sátti úlken tolqynyspen qabyldaǵanyn aıtady. Quralaı Saǵyndyqova baıqaý barysynda ár óńirden kelgen pedagogter az ýaqyt ishinde bir komandaǵa birigip ortaq joba ázirlegenin atap ótti. Al Asyl Bolathanulynyń pikirinshe, baıqaý kásibı damý turǵysynan alǵanda mańyzdy tájirıbe bergen. Ol qatysýshylar deńgeıiniń joǵary bolǵanyn atap ótti. Jeńimpazdardyń pikirinshe, bul hakaton tek jarys emes, tájirıbe alańy boldy jáne mundaı jobalar jalǵasyn tabýǵa tıis.
Sarapshy Tólegen Kákimuly mundaı formattaǵy baıqaýlar pedagogterdiń kásibı damýyna serpin beretinin atap ótti.
«Qysqa ýaqyt ishinde ár óńirden kelgen pedagogter bir komandaǵa birigip, ortaq joba ázirledi. Eń mańyzdysy − ıdeıany tájirıbede júzege asyrý», dedi ol.
«EduAI: Pedagogıkalyq hakaton» elimizdegi bilim berý júıesine jasandy ıntellektini engizýge baǵyttalǵan mańyzdy bastamalardyń biri retinde baǵalandy. Uıymdastyrýshylar mundaı jobalar aldaǵy ýaqytta da jalǵasyp, pedagogterdiń sıfrlyq quzyretterin arttyrýǵa jáne jańa bilim berý tásilderin damytýǵa yqpal etetinin atap ótti.
Janasyl Zaıtımhan,
EUÝ stýdenti
