Beısenovanyń aıtýynsha, elordada 101 tártip buzýshy anyqtaldy, olar qosymshadaǵy «qyzyl» jáne «sary» statýsyna qaramastan mekemelerge kirgen. Sarhat Beısenova óz sózinde olarǵa oqshaýlaý rejımin saqtaý boıynsha túsindirý jumystary júrgiziletinin atap ótti.
«Ambýlatorııalyq naýqastardyń jáne jaqyn baılanysta bolǵan adamdardyń shekteý sharalary men karantındi buzýyna birneshe ret nazar aýdaryldy. Olar áli de koronavırýstyq ınfeksııanyń kóbeıýiniń negizgi sebebi bolyp qala beredi», dedi Nur-Sultannyń bas sanıtarlyq dárigeri.
Qalanyń bas sanıtarlyq dárigeriniń málimetinshe, júrgizilip jatqan is-sharalardyń arqasynda COVID-19 jaǵdaıy turaqtanyp, indet kórsetkishi tómendedi. 100 myń turǵynǵa shaqqandaǵy aptalyq syrqattanýshylyq kórsetkishi mamyr aıymen salystyrǵanda 210-nan 110-ǵa deıin tómendedi. Qazirgi ýaqytta qalada ınfeksııanyń belsendi oshaǵy – 1 576, onyń ishinde: úı – 1 229, uıymdastyrylǵandar arasynda – 347. Medısınalyq baqylaýda 3 216 baılanysta bolǵan adam bar.
Koronavırýstyq ınfeksııanyń taralýynyń aldyn alý maqsatynda Qazaqstan Respýblıkasy Densaýlyq saqtaý mınıstrligi KVI-men aýyratyn naýqastar men baılanysta bolǵan adamdar úshin sanıtarııalyq qaǵıdalardy bekitti. Oqshaýlaý rejımin oryndamaı, «Ashyq» platformasy arqyly anyqtalǵandarǵa ákimshilik jaza qarastyrylǵan.
Qaýlyǵa sáıkes, eger azamat statýsyn bile tura, ózin-ózi oqshaýlaý rejımin buzsa jáne aınalasyndaǵylarǵa qasaqana juqtyrý qaýpin týdyrsa, onda QR ÁQBtK-niń 425-babynyń 1-bóligimen oǵan 30 AEK nemese 87 510 teńge mólsherinde ákimshilik aıyppul túrindegi jaza qoldanylady. Osy qaǵıdalar 2021 jyldyń 10 maýsymynda kúshine enedi.
«Qyzyl» nemese «sary» statýsy bar turǵyndar oqshaýlaý rejımin buzyp, qoǵamdyq oryndarda emin-erkin júrse, COVID-19 tasymaldaýshy bolyp sanalady. Osylaısha ımmýnıteti tómen azamattarǵa, qarttar men balalarǵa, sondaı-aq basqa da qaýip tobyndaǵy adamdarǵa juqtyrady. Bul óz kezeginde Nur-Sultan qalasynyń «qyzyl aımaqtaǵy» ýaqytyn ulǵaıtyp, syrqattanýshylyq kórsetkishiniń kúndelikti ósýine áser etedi», dep qorytyndylady Nur-Sultan qalasynyń bas sanıtarlyq dárigeri.
