«Jalpy eldegi epıdemııalyq jaǵdaı turaqty. Buǵan qabyldanyp jatqan keshendi sharalar, onyń ishinde halyqty vaksınalaý oń yqpal etýde. Búginde óńirler vaksınamen tolyqtaı qamtamasyz etilgen. Respýblıka boıynsha kún saıyn 68 myńnan asa adam vaksına alyp jatyr, onyń ishinde birinshi komponent 44 myń», dedi E. Toǵajanov.
Osy oraıda ol óńir ákimdikterine tıisti tapsyrmalardy berý kerektigin atap ótti.
«Birinshiden, óńirler halyqty vaksınalaý qarqynyn arttyrý boıynsha naqty sharalar qabyldaýy qajet. Bul baǵyttaǵy jumysty ákimder jeke baqylaýyna alýy tıis. Ekinshiden, bıznes sýbektilerin Ashyq jobasyna tartýdy kúsheıtý kerek. Úshinshiden, «Atameken» UKP-men birge Ashyq jobasyna qosylǵan kásipkerler arasynda qabyldanǵan talaptardy saqtaý boıynsha túsindirý jumystaryn júrgizýimiz qajet», dedi Úkimet basshysynyń orynbasary.
Sonymen qatar ol kásipkerlik sýbektiler tarapynan qyzmetin zańsyz júrgizýdi boldyrmaý maqsatynda da monıtorıng toptarynyń jumysyn kúsheıtýdiń mańyzyn aıtty.
Aldyńǵy aqparattarymyzda habarlaǵandaı, Úkimet basshysy Asqar Mamın ákimdikter men Densaýlyq saqtaý mınıstrligi jaz kezinde vaksınalaý qarqynyn barynsha ulǵaıtýy qajet ekenin, ásirese, Mańǵystaý, Aqmola, Qostanaı oblystary men Nur-Sultan qalasynda bul baǵyttaǵy jumystardy kúsheıtýdiń mańyzyn aıtty. Barlyq deńgeıdegi ákimderge vaksınasııa máselesin jeke baqylaýǵa alýy tapsyrydy.
