Osyǵan oraı akademııa bazasynda endi kıberqylmyspen kúresetin mamandar daıarlana bastady. Endigi kezekte polısııa qyzmetkerleri qoǵamdyq tártiptiń kúzetshileri ǵana emes, baǵdarlamashy qyzmetine kirisip, hakerlermen kúrestiń amal-aılasyn meńgermek.
Almaty akademııasy bastyǵynyń orynbasary Janat Dilbarhanova tehnologııa kún saıyn ózgerip jatqan zamanda kıberqylmyspen kúresý óte mańyzdy, deıdi. Onyń aıtýynsha, kıberqylmyspen kúres mamandyǵyna osy saladan tájirıbesi bar kadrlar tańdap alynǵan. Internettiń damýymen zııankester qazir ártúrli messendjerlerdiń, áleýmettik jelilerdiń, tipten qol telefonnyń kómegimen azamattardy aldaýdyń jańa ádisine kóshken. Al kıberqylmyspen kúresýdiń álippesin meńgerýge kirisip ketken bolashaq mamandar úshin aqparattyq tehnologııalardyń ozyq ádisterin jiti meńgerýge týra keledi. Bul óz kezeginde onlaın-saladaǵy qylmystardy aýyzdyqtaýǵa múmkindik beredi. Al olardyń daıyndyǵyna basqa da uıymdar men mekemelerdiń mamandary tartylyp otyr. Zamanaýı tehnologııalar kún saıyn jańaryp otyrǵan kezeńde bul máselede kásipqoılardyń qatysqany tıimdi. Olardyń kómegimen Akademııadaǵy ortalyqtyń aqparattyq bazasy tolyqtyrylyp, oqý úrdisin jetildirýdegi múmkindikteri paıdalanylady.
Oqytý baǵdarlamasy negizinen tájirıbege negizdelgen. Oqý barysynyń shamamen 70 paıyzy praktıkalyq sabaqtardan turady. Onyń barysynda kıberqylmystardy ashýdyń, dáleldemelerdi tabý men belgileýdiń, IT-tehnologııalardyń, telefon baılanysynyń kómegimen jasalatyn quqyq buzýshylyqtardy tergeýdiń zamanaýı ádisteri úıretiledi.
ALMATY
