Osy ýaqyt aralyǵynda aýyz toltyryp aıtýǵa bolatyn aýqymdy jumystar atqarylyp, mańyzdy sheshimder qabyldandy. Eń bastysy, eldiń eńsesi bıiktep, abyroıy arta tústi.
Otandastarymyz jaqsy biletindeı, osydan eki jyl buryn Tuńǵysh Prezıdent – Elbasy Nursultan Nazarbaev tarıhı sheshim qabyldap, el Prezıdenti laýazymyn Qasym-Jomart Toqaevqa usynǵan bolatyn. Bul «jeti ret ólshep, bir ret kesilgen», jan-jaqty tarazylanǵan sheshim bolǵany anyq. Sebebi el tizginin ustaý, Memleket basshysy bolý degen ońaı dúnıe emes. Oǵan qosa, durys sheshim qabyldap, «ógizdi óltirmeýdiń, arbany syndyrmaýdyń» jaýapkershilik júgi taǵy bar.
Qasym-Jomart Toqaev ózine júktelgen mańyzdy mindetti abyroımen arqalap keledi. Syn saǵattarda synalyp, shyńdaldy.
Árıne, kóp adam «eki jylda elimizde ne ózgerdi, qandaı mańyzdy sheshimder qabyldandy?» degen suraq qoıýy múmkin. Elimizde osy aralyqta oń ózgerister óte kóp boldy. Máselen, Memleket basshysy Qasym-Jomart Toqaevtyń Jarlyǵymen Prezıdent janyndaǵy Ulttyq qoǵamdyq senim keńesi quryldy. О́tken eki jyldyń bıiginen qaraıtyn bolsa, atalǵan Keńes «Halyq únine qulaq asatyn memleket» tujyrymdamasyn iske asyrýǵa zor úles qosa alǵanyn baıqaýǵa bolady.
Bul Keńes halyqty tolǵandyrǵan, qoǵamdy mazalaǵan kóptegen másele men suraqtyń jaýabyn izdep, olardyń oń sheshim tabýyna bastamashy boldy. El taǵdyryna beıjaı qaraı almaıtyn otandastarymyz, belsendi azamattar, táýelsiz sarapshylar osy Keńestiń tóńiregine toptasyp, tizge qosyp, bas biriktirdi. Eki jylǵa jýyq merzimde Ulttyq qoǵamdyq senim keńesiniń músheleri júıeli jumystyń nátıjesin kórsete aldy. Túrli usynys aıtylyp, baıypty bastamalar kóterdi. Onyń ózi qoǵamdaǵy kelisimniń jemisti jetistigi, ózindik nátıjesine aınaldy. Sonyń tuma bastaýynda Qasym-Jomart Toqaev tur.
О́zderińiz jaqsy biletindeı, ekonomıka bir ǵana Qazaqstanda, bolmasa bir ǵana Ortalyq Azııada emes, búkil álemde qubylmaly bolyp tur. Osynaý syn saǵatta Memleket basshysynyń Qazaqstan halqyna jasaǵan janashyrlyǵy men tanytqan qamqorlyǵy – nesıe amnıstııasy der edim. Mundaı amnıstııany Prezıdent eki jyl ishinde bir emes, birneshe márte jasady. Sonyń nátıjesinde qanshama otandasymyz qoldaý kórip, ıyqtaǵy júktemesin jeńildete aldy. Bul da – Prezıdentke tán patrıotızmniń, azamattyqtyń belgisi.
Álemdi ábigerge salǵan pandemııa jaǵdaıynda ómir súrip jatqanymyzǵa da bıyl bir jyldan asyp barady. Osy kezeńniń ózinde Qasym-Jomart Toqaev ózin isker tulǵa, kóshbasshy retinde kórsete aldy. Dúnıe dúrligip jatqanda Prezıdentimiz otandastarymyzdyń tyǵyryqqa tirelýine jol bergen joq. Halyqty, kásipkerlikti qoldaýǵa arnalǵan ıgi ister, tyń bastamalar qolǵa alyndy. Qarapaıym azamattar, bıznesmender eńsesi basylyp, qoldaýsyz qalǵan joq. Osynyń barlyǵy Memleket basshysy atqarǵan aýqymdy jumystardyń naqty nátıjesi dep bilemin. Mundaı aýyr mindet pen jaýapkershilik júgin ekiniń biri arqalaı da, atqara da almaıdy.
Pandemııa adamzat balasynyń alqymynan alǵaly beri dúnıe júzinde onnan astam ǵana vaksına tirkelgenin bilemiz. Sol saýsaqpen sanarlyq vaksınalardyń arasynan otandyq QazCovid-in oıyp turyp oryn aldy. Bul neniń belgisi? Memleket basshysy elimizdegi ilim-ǵylymnyń, medısına salasynyń damýyna senimdi serpilis ala keldi. El ishinde «úıdiń otaǵasy qandaı bolsa, otbasynyń jaǵdaıy da soǵan saı bolady» degen sóz bar.
Prezıdentimiz jer-jahandy jaılaǵan indetke, qıyn-qystaý kezeńge qaramastan, elimizdegi ǵylymnyń ilgerileýine kóp kóńil bólip otyr. QazCovid-in vaksınasyn qulshynystyń naqty nátıjesi deýge bolady.
Memleket basshysynyń eldi eleń etkizgen taǵy bir bastamasy – zeınetaqy qoryndaǵy qarajatty tıimdi paıdalanýǵa berý máselesin jolǵa qoıǵany. Bul – kóptegen memleket basshylarynyń qolynan kelmeıtin, mundaı qadamǵa barýǵa batyly jetpeıtin bastama. Sol qadamdy Qasym-Jomart Toqaev jasady. Sonyń nátıjesinde kóptegen otandasymyz baspanaly bolyp, baspana almaǵandary qarajattaryn densaýlyǵyn jaqsartýǵa jumsady. Osy ıgi bastama áli de jalǵasyn taýyp jatyr.
Árıne, el Prezıdentiniń elge sińirgen eńbegin shaǵyn maqalaǵa syıdyrý múmkin emes. Bizdiń aıtyp otyrǵanymyz – eki jylda atqarylǵan eńseli isterdiń bir parasy ǵana. Alda aýqymdy jumystar, mańyzdy bastamalar, baǵyndyrar belester kóp. Eń bastysy, Memleket basshysynyń ár qadamy halyqtyń jaǵdaıyn jaqsartýǵa, turmysyn túzeýge, ál-aýqatyn arttyrýǵa baǵyttalyp keledi. Keler jyldary da solaı bola beretinine senimdimin.
Gennadıı ShIPOVSKIH,
Májilis depýtaty
