Jastardyń Qazaqstandaǵy úlesi joǵary ekenin bilemiz. Statıstıkaǵa súıensek 18 ben 29 jas aralyǵynda jastardyń sany 4,5 mıllıonǵa jýyq. Jastarǵa bilim berý, jumysqa ornalastyrý jáne baspana berý memleket úshin basym baǵyt. Sońǵy jyldary memleket jastarmen olardyń otbasyna aıtarlyqtaı kóńil bólýi - úsh baǵyttyń aıqyn kórinisi. Elimizdiń barlyq aımaqtarynda kópqabatty úıler salynyp, jastarǵa jeńildetilgen sharttarmen berilip jatyr.
Úıdi satyp alý quqyǵynsyz jalǵa alý
Nur-Sultan, Almaty jáne Shymkent qalalarynda satyp alý quqyǵynsyz jalǵa beriletin turǵyn úı alý baǵdarlamalary qarastyrylǵan. Bul baǵdarlama jumys isteıtin jas mamandardyń ýaqytsha baspanamen qamtýǵa baǵyttalǵan. Satyp alý quqyǵynsyz jalǵa beriletin úılerdi 5 jylǵa deıin jaldap turýǵa bolady.
Premer-mınıstr Asqar Mamınniń aıtýynsha, elimizde jumys isteıtin jastarǵa jalǵa beriletin baspana jobasyn qarjylandyrý 2025 jylǵa deıin uzartylatyny jaıly aıtty. О́tken jyly Nur-Sultan, Almaty, Shymkent qalalarynda jastardy qoldaý maqsatynda 4 myń baspana jalǵa berildi. Al 2021 jyly jospar boıynsha 3 myń baspana bólinedi.
«Indýstrııa jáne ınfraqurylymdyq damý mınıstrligi aǵymdaǵy jyly 3 myń páter berý máselesin qarastyrýda. Sonymen qatar, baǵdarlamany 2025 jylǵa deıin iske asyrý boıynsha jumystar atqarylyp jatyr. 2021-2025 jyldary «Nur Otan» partııasynyń saılaýaldy baǵdarlamasyna sáıkes jyl saıyn respýblıkalyq mańyzy bar qalalarda 3 myń jasty osyndaı turǵyn úımen qamtamasyz etý josparlanýda», dedi Asqar Mamın.
Ol 2025 jylǵa qaraı elimizdiń jumys isteıtin jastaryna 15 myń páter beriletinin atap ótti.
Baǵdarlamaǵa qatysý úshin qoıylatyn talaptar:
- Jasy - 29-ǵa deıin;
- Atynda jyljymaıtyn múliktiń bolmaýy;
- Resmı túrde jumysy ne kásibi bar azamattar;
- Jalpy bilim beretin mektepterdiń, tehnıkalyq jáne kásiptik jáne orta bilimnen keıingi, joǵary jáne joǵary oqý ornynan keıingi bilim berý uıymdarynyń bilim beretin oqý baǵdarlamalaryn meńgerýi;
- О́tinish beretin qalada sońǵy 2 jyldan kem emes turaqty tirkelýin rastaý;
- Aılyq tabysy keminde - 40 AEK (2021 jyly - 116 680 teńge);
- Qazaqstandyq ekinshi deńgeıli bankte depozıttiń bolýy shart.
«Jas otbasy» baǵdarlamasy
2020 jyly 1 shildeden bastap jas otbasylardy qoldaýǵa arnalǵan taǵy bir baǵdarlama iske qosyldy. Jańa baǵdarlama otaý qurǵandarǵa arzan ıpotekamen baspana satyp alýǵa múmkindik beredi. Ipotekanyń alǵashqy eki jylda jyldyq nesıe mólsherlemesi 6%-ke teń, odan keıin ol 5%-ke deıin tómendeıdi. Ipoteka 6 jyldan 9 jylǵa deıin beriledi.
Baǵdarlamaǵa qatysýshylarǵa qoıylatyn talaptar:
- Erli-zaıyptylardyń bireýi nemese ekeýi Otbasy bankte «Jas otbasy» depozıtin ashý;
- Bir jyl ishinde bolashaqta satyp alatyn páter baǵasynyń 50%-in jınap, baǵalaý kórsetkishiniń 5-shi deńgeıine jetkizý;
- Erli-zaıyptynyń nekege turǵan merzimi 3 jyldan aspaýy tıis.
Baǵdarlama respýblıkanyń barlyq aımaǵynda turaqty túrde júzege asyrylady. Depozıtke aqsha jınaý kezinde depozıtke jyldyq 2%-dyq bank syıaqysy jáne 20%-dyq jyl saıynǵy memleket syıaqysy túsedi. Buǵan qosa, erli-zaıyptynyń jasy men otbasyndaǵy balalar sanyna shekteý qoıylmaıdy.
Baǵdarlama shartyna sáıkes, jas otbasy páterdi jańa jáne buryn qoldanysta bolǵan turǵyn úılerden satyp ala alady. Munymen qatar, jer telimin alyp, úı salýyna da bolady.
Súndet Oralbekov
