Alǵashqy qadam retinde maýsymnyń basynda Esentaı ózeniniń rekreasııalyq aımaǵynda alleıa otyrǵyzyldy. Biraq karantın sharalary eskerile otyryp, jumysty mamandandyrylǵan kompanııa júrgizdi. Eýrazııalyq bank jaqsy jersinýi úshin 75 aǵashty óz topyraǵymen otyrǵyzýdy qarjylandyryp ári budan bylaı eki jyl boıy alleıany kútip-baptaý shyǵyndaryn óz moınyna aldy.
«Byltyr qala boıynsha rekordqa qol jetkizip, 282 myń aǵash otyrǵyzdyq. Buryn qalada jylyna 30-40 myńdaı aǵash otyrǵyzylatyn. Kógaldandyrý jumystary negizinen Alataý jáne Naýryzbaı aýdandarynyń biriktirilgen aýmaqtarynda júrgizildi. Kóktemde 64 myń aǵash kósheti boı túzedi. Jalpy jyl sońyna deıin 300 myń shybyq otyrǵyzý josparlanyp otyr. Sondyqtan qala ákiminiń 1 mln aǵash otyrǵyzý jónindegi bastamasyn qoldaýda bıznes pen qoǵamnyń kez kelgen kómegin qýana qabyldaımyz», dedi Jasyl ekonomıka basqarmasynyń basshysy Natalıa Lıvınskaıa.
«Biz qala men onyń tóńiregindegi ekologııalyq ahýaldy jaqsartý úshin memlekettik organdarmen, bıznespen, qoǵamdyq uıymdarmen jáne ekokóshbasshylarmen birlesken túrli tabıǵat qorǵaý sharalaryn iske asyrǵaly otyrmyz. Maqsatymyz – jahandyq ekologııalyq syn-qaterlerge nazar aýdarý jáne ony sheshý úshin naqty qadamdardy júzege asyrý. Osy maqsatta 2021 jyldyń 13 mamyrynda «Astana» halyqaralyq qarjy ortalyǵynyń ókilettigimen AHQO Jasyl qarjy ortalyǵynyń qoldaýymen Eurasian Environmental Fund kommersııalyq emes uıymy tirkeldi», dedi Eurasian Environmental Fund KEU bas dırektory Roza Nurtazına.
«El Prezıdenti Qasym-Jomart Toqaev 2060 jylǵa qaraı Qazaqstandy kómirtegi táýeldiliginen aryltý mindetin qoıdy. Ony iske asyrýdyń bir tásili – qalalardy kógaldandyrýdy qarqyndatý jáne jasyl tehnologııalardy engizý. AHQO Qazaqstannyń ekologııalyq baǵdarlamasyna belsene qatysady jáne bıznes pen qoǵamdastyqty yntalandyrý úshin qajetti ınfraqurylymdy qurady», dedi AHQO Jasyl qarjy ortalyǵynyń bas dırektory Aıdar Qazybaev.
Osynaý kókeıkesti sharýada Eýrazııalyq bank jasyl qarjy tehnologııalaryn paıdalana otyryp, óziniń damýynyń jańa kezeńin bastaıdy jáne ekologııalyq mazmundaǵy arnaıy bank ónimin ázirleıdi. Onyń ústine bank kez kelgen qazaqstandyq banktiń tólem kartasyna bir janasý arqyly aǵash otyrǵyzýǵa qarajat aýdarýǵa múmkindik beretin Qazaqstandaǵy alǵashqy NFC-posterlerdi ornatady.
«Búginde bankterdiń qyzmeti tek qarjylyq kórsetkishtermen jáne saýatty basqarýmen ǵana baǵalanbaıdy. Bank qoǵamnyń áleýmettik jáne ekologııalyq damýyna atsalysýy tıis. Bizdiń banktiń kúsh-jigeri jasyl ekonomıka jobalaryn qoldaýǵa jáne ekologııalyq dostyq bank servısin qurýǵa baǵyttalady. Bul qashyqtan qyzmet kórsetý arnalary men onlaın-tólemderdi damyta otyryp, plastık pen qaǵaz paıdalanýdy birtindep azaıtyp, qaıta jańǵyrtylmaıtyn resýrstardy ońtaıly jumsaıtynymyzdy bildiredi. Biz klıentterimizben birge arnaıy bank ónimderi arqyly aǵash otyrǵyzýdy jalǵastyratyn bolamyz», dedi Eýrazııalyq banktiń basqarma tóraǵasy Valentın Morozov.
«Búgingi tańda klımattyń ózgerýi árqaısymyzǵa óziniń teris áserin tıgizýde. Ásirese, halyqtyń áleýmettik-ekonomıkalyq osal toptaryna ońaı soqpaıdy. Biz bul jaǵdaıda bıznes ekologııalyq jaýapkershilikti óz moınyna alýy tıis dep sanaımyz. О́ıtkeni, planeta resýrstaryn sarqı otyryp, ekonomıkalyq órleýge qol jetkizý múmkin emes. Bul joba jaqsy ózgeristerge alyp keletinine senimdimin. Qorshaǵan ortany qorǵaý – bizdiń ortaq isimiz», dedi Mastercard kompanııasynyń Ortalyq Azııadaǵy bas dırektory Rafal Trepka.
Oraıy kelip turǵanda, Mastercard shyǵaryndylardy qysqartý jónindegi maqsattaryn óz bastamasymen SBTI (Science Based Targets Initiative) maquldaǵan alǵashqy tólem kompanııasy ekendigin aıtý kerek. Jaqynda kompanııa 2025 jylǵa qaraı parnık gazdarynyń energetıkalyq tikeleı jáne janama shyǵaryndylaryn 38%-ǵa, al basqa janama shyǵaryndylardy 2016 jylmen salystyrǵanda 20%-ǵa qysqartýǵa nıetti ekenin málimdedi. Mastercard jańǵyrtylatyn energııa kózderi men energııa tıimdiligin arttyrý baǵdarlamalaryna basymdyq beredi: kún panelderine Mastercard data-ortalyqtary tutynatyn energııanyń 50% úlesi tıesili. Kompanııa jetkizilim tizbegine baılanysty shyǵaryndylar 2020 jyldyń sońynda onyń kómirtegi iziniń 70%-dan astamyn quraǵanyn atap ótti. Osyǵan baılanysty Mastercard jetkizýshilerge parnık gaz shyǵaryndylaryn azaıtý maqsattaryn anyqtaýǵa jáne oǵan qol jetkizýge qoldaý kórsetýdi josparlap otyr. Áriptestiktiń nátıjesinde Mastercard klıentteri ózderi qaldyrǵan kómirtegi izin eseptep, tutynýshylyq minez-qulqynyń áserin baǵalaı alady. Sonymen qatar Mastercard qaıta óńdelgen shıkizattan plastık kartalar shyǵarý jónindegi áriptestikke de muryndyq boldy.
ALMATY
