Shveısarııanyń kýrortty aımaǵy Andermatt qalasynda ótken sońǵy segizinshi kezeńde veloshabandozdar 160 shaqyrym joldy júrip ótti. Kezeń bastalǵan sátten bastap Astana – Premier Tech velokomandasynyń sportshylary óte belsendi boldy. Nátıjesinde Omar Fraıle jarys jolynyń basym bóligin kóshbasyndaǵy negizgi topta ótkizdi. Sen-Gottard taýynyń bókterinde kóshbasshy top ydyrady. Sodan keıin Omar Fraıle Iаkob Fýlsangqa kómektesý úshin pelotonǵa qaıta oraldy.
Qazaqstandyq-kanadalyq komandanyń dat shabandozy júldeli orynǵa ıe bolý úshin qarsylastaryna qarsy shabýylǵa shyǵýǵa bel býdy. Birneshe umtylystan keıin Fýlsang favorıtter tobynda irikteý júrgizip, basty qarsylasy nemis shabandozy Maksımılıan Shahmandy toptan shyǵardy. Tómen túsý kezinde bar kúsh-jigerin salyp, Shahmanǵa jaqyndaýǵa múmkindik bermedi. Osylaısha Iаkob Fýlsang Shahmannan 12 sekýnd alǵa ozyp, kezeńde 9-nátıje kórsetti. Osy kórsetkishtiń ózi oǵan «Shveısarııa týrynyń» qorytyndy jalpy klassıfıkasııasynda úshinshi bolý úshin jetkilikti boldy.
Sońǵy kezeńde Dimension Data komandasynyń shveısarııalyq ókili Djıno Meder jeńiske jetti. Ol 160 shaqyrymdy 4 saǵat 6 mınýt 25 sekýndta júrip ótti. Al kanadalyq Maıkl Výds (Israel Start-Up Nation) máre syzyǵyn ekinshi bolyp kesse, ıtalııalyq Mattıa Kattaneo (Deceuninck-Quick Step) úzdik úshtikti túıindedi.
Jalpy kezeńniń qorytyndysy boıynsha 2019 jylǵy «Djıro d’Italııa» jarysynda top jarǵan ekvadorlyq Rıchard Karapas (Ineos Grenadiers) jeńimpaz atandy. Al Kolýmbııanyń úzdigi Rıgoberto Ýran (EF Education-Nippo) ekinshi orynǵa ıe boldy. Karapastan 1 mınýt 15 sekýndqa qalyp qoıǵan Iаkob Fýlsang «Shveısarııa týrynyń» qola júldesin qanaǵat tutty.
Bir aptaǵa sozylǵan velosportshylardyń básekesinde Astana – Premier Tech kapıtany Iаkob Fýlsang ekinshi jáne segizinshi kezeńde úzdik ondyqtyń qataryna ense, besinshi taýly kezeńinde jarysty ekinshi bolyp aıaqtady. Márege 15 shaqyrym qalǵanda favorıtter tobynan shabýyldaǵan Fýlsang keıinirek jeke-dara kósh bastaǵan edi. Alaıda márege jaqyndaǵanda ony ekvadorlyq Rıchard Karapas basyp ozyp, kezeń jeńimpazy atanyp ketti.
«Shveısarııa týrynda» júldeli orynnan kóringenime qýanyshtymyn. Endi men el chempıonatyna qatysý úshin óz otanyma oralamyn. Al sodan keıin bizdi «Týr de Frans» dodasy kútip tur. Sonymen, alda kóptegen mańyzdy jarystar bar jáne durys baǵytta kele jatyrmyn dep oılaımyn. Meniń bıylǵy basty maqsatym – Olımpııa oıyndarynda baq synaý», dedi Iаkob Fýlsang.
