Oblystyq mádenıet basqarmasy uıymdastyrǵan is-sharaǵa oblys basshylary, Qazaqstan Jazýshylar odaǵy basqarmasynyń tóraǵasy, aqyn Ulyqbek Esdáýlet, aqynnyń Almaty, Nur-Sultan, Aqtóbe qalalarynan kelgen qalamdastary men óńirdegi zııaly qaýym ókilderi qatysty.
Birinshi bolyp quttyqtaý sóz alǵan oblys ákiminiń orynbasary Arman Ábenov mereıtoı ıesine Memleket basshysy Qasym-Jomart Toqaevtyń quttyqtaý hatyn tapsyrdy.
Prezıdenttiń quttyqtaý hatynda «Qurmetti Aqylbek Qojauly, sizdi mereıtoıyńyzben quttyqtaımyn! Áriptesterińiz ózińizdi búgingi zamanymyzdyń kókeıkesti máselelerin kóterip, qoǵam damýyna ún qosyp júrgen qarymdy qalamger retinde jaqsy biledi. Týyp ósken óńirińizde óner men mádenıettiń keń qanat jaıýyna, ana tilimizdiń mártebesiniń bıikteýine jan-jaqty atsalysyp júrsiz. Qostanaı memlekettik ýnıversıtetinde qyzmet jasap, jýrnalıst bolýǵa talpynǵan jastardyń bilikti mamandyq ıesi atanýyna úles qostyńyz. Eldiń birligin, Táýelsizdiktiń tarıhı mańyzyn, halyqtar dostyǵyn, adamzat qundylyǵyn arqaý etken óleńderińiz jyrsúıer qaýymnyń oń baǵasyn alyp otyr. Aldaǵy ýaqytta da tartymdy týyndylaryńyzdy usynyp, el-jurttyń qurmetine bólene berýińizge tilektespin! Sizge zor densaýlyq, otbasyńyzǵa bereke tileımin!» delingen.
Odan keıin Arman Ábenov aımaq basshysy Arhımed Muhambetovtiń Alǵys hatyn tabystap, aqynnyń ıyǵyna shapan japty.
Mereıtoı ıesine Senat tóraǵasy Máýlen Áshimbaevtyń lebiz haty da tapsyryldy.
Keshke arnaıy kelgen QR Jazýshylar odaǵy basqarmasynyń tóraǵasy Ulyqbek Esdáýlet Aqylbek Shaıahmet shyǵarmashylyǵy haqynda oı tolǵady.
«Qostanaıǵa qansha kelip júrsem de, Aqylbekti qansha kórip júrsem de, asaý bir tolqynǵa qarsy júzgen qaıratker qaısarlyqty kóremin. Ol jalǵyzbyn degen joq. Artynda qalyń el baryna sendi. Keıde maǵan Aqylbek muzjarǵysh keme sııaqty kórinedi. Toń men muzdy buzyp-jaryp artynan jol salyp keledi. Al endi ol jol ashylǵannan keıin ol jolmen júrý keıingi tolqynǵa da, el-jurtqa da jeńil emes pe? Aqynnyń ádebıettegi, mádenıettegi, ulttyq tildi ornyqtyrýdaǵy, ulttyq múddelerdi qorǵaýdaǵy jankeshti eńbegi erekshe. Qaıratkerligińiz úshin, qaıtpaıtyn, qajymaıtyn, talmaıtyn qaısarlyǵyńyz úshin jáne osyndaı azamatty bergen Qostanaı topyraǵy úshin biz – búkil qalamgerler qaýymy qaryzdarmyz dep esepteımin. Aqylbektiń keshe ǵana balalarǵa arnalǵan kishileý-kishileý 20 kitaby jaryq kórdi. Bul az dúnıe emes. Bıyl balalar ádebıetiniń jyly. Soǵan laıyqty úlesin qosyp otyr. Al endi oǵan deıin shyǵarǵan kitaptarynyń bárin eseptegen kezde 70 jylda 70 kitaby shyqqan eken. Bir jastan bastap kitap shyǵara bastaǵansyń ba dep ázildeıtin sebebimiz osy. Rýmıdiń sózi bar: «men talaı adamdy kórdim ústinde kıimi joq, men talaı kıimdi kórdim ishinde adamy joq», deıtin. Ol ómirden adam izdep ótken ǵulamanyń bireýi. Al endi Qostanaı sııaqty tyń óńirinde óz oqyrmandarynyń, óz keıipkerleriniń ortasynda bizdiń naǵyz aýyz toltyryp aıtatyndaı, aty-jónin altyn árippen jazatyndaı adamymyz, aqynymyz, dramatýrgimiz, aýdarmashymyz bar», dep tebirene sóılegen Odaq basshysy aqynnyń keshin respýblıkalyq deńgeıde ótkizýge árkez atsalysýǵa daıyn ekenin jetkizdi.
Kesh barysynda Almatydan kelgen aqyn Qasymhan Begmanov, belgili aqyn, aýdarmashy Ábjan Ábiltaı, Qostanaı oblysynyń qurmetti azamaty Serikbaı Bısetaev jáne basqalar sahna tórine kóterilip, jyly lebizderin aıtty. Aqynnyń shyǵarmashylyǵy, tulǵalyq kelbeti týraly tolǵanyp, qazirgi ýaqytta kúlli respýblıkalyq basylymdarda qalamger shyǵarmashylyǵyna oryn berilip, aty ardaqtalyp jatqanyn sóz etti.
Almaty oblysynyń ákimi Amandyq Batalovtyń quttyqtaýy men syı-sııapatyn ala kelgen jetisýlyq meımandar da aǵynan jaryla tilek aıtty.
Quttyqtaýlar legi tolastaı bergende mereıtoı ıesi ortaǵa shyǵyp, ár kezderi jazylǵan óleńderin oqydy.
Aqyn óleńderine jazylǵan ánderdi oryndaǵan Almaty, Qostanaı oblystyq fılarmonııasynyń ánshileri shyǵarmashylyq keshtiń shyraıyn asha tústi.
