Ekinshi týr oıyndary aıasynda ótken kezdesýde qurama komandalardyń kúshteri teń boldy.
Glazgodaǵy (Shotlandııa) «Hempden Park» stadıonynda ótken kezdesýde fýtbolshylar kópshilik jankúıerdiń kóńilinen shyǵatyndaı oıyn kórsetti. Birinshi taımda «Shaqpaq jeıdeli» eldiń oıynshylary belsendi oınap, qarsylas qaqpanyń mańynda qaýipti shabýyl uıymdastyrǵanymen, báribir esepti Chehııa quramasy ashty. Oıynnyń 33-mınýtynda buryshtamadan asyrylǵan dopqa talas kezinde horvatııalyq fýtbolshy Patrık Shıkke qarsy oıyn tártibin buzdy. Bul jaǵdaıǵa eki oıly bolǵan bas tóreshi VAR-dyń kómegine júginip, sońynda Chehııa qaqpasyna penaltı belgiledi. Shotlandııaǵa qarsy ótken oıynda eki gol soǵyp, komandasyna mańyzdy úsh upaı syılaǵan Patrık Shık 11 metrlik aıyp dobynan múlt ketken joq.
Al ekinshi taımda Slovenııa oıynshylary basymdyq tanytqanymen, 47-mınýtta Horvatııa quramasy tarazy basyn teńestirip ketti. Gol avtory – Ivan Perıshıch. Bir qyzyǵy, 32 jastaǵy shabýylshy alańǵa ekinshi taımnyń basynda, ıaǵnı 46-mınýtta shyqqan bolatyn. 1:1 esebi match sońyna deıin ózgergen joq.
Osylaısha bıylǵy Eýropa chempıonatynda tuńǵysh golyn soǵyp, alǵashqy upaıyna qol jetkizgen Horvatııa týrnır kestesinde úshinshi orynǵa kóterilip aldy. Al Chehııa quramasy 4 upaımen kósh bastap keledi.
