Italııa 80 jyldyq rekordyn qaıtalady

Italııany Ýels te toqtata almady

Bıylǵy dop dodasynyń favorıtine aınalǵan Italııa asa tartysty ótken kezdesýde Ýelsten basym túsip, tolyq 9 upaı jıdy. Tóreshi ysqyra salysymen Ýels qaqpasyn torýyldaǵan Manchını shákirtteri aqyry 39-mınýtta qaqpa kiltin tapty. Matteo Pessına esep ashyp, komandasyn alǵa shyǵardy. Ekinshi taımda da ıtalııalyqtar qarqyndy oıyn órnegin kórsetti. 55-mınýtta Itan Ampadý dó­reki oıyny úshin qyzyl qaǵaz alyp, alańnan qýyldy. On oıynshymen oınaý Ýelske tipti qıynǵa soqty. Soǵan qaramastan kezdesý sońyna deıin esep ózgerissiz kúıinde qaldy.

Sóıtip Roberto Manchını shákirtteri toptyq kezeńdegi úsh oıynda jeńiske jetip, jeńilissiz oıyn serııasyn 30-ǵa deıin jetkizdi. Osylaısha, Manchını 1930 jylǵy Vıttorıo Possonyń rekordty qaıtalady. Son­daı-aq Italııa keıingi 11 oıynda óz qaqpasyna birde-bir gol ótkizgen joq. Esep – 32:0. Sońǵy ret «Skýadra adzýrra» qaqpasyna 2020 jyldyń qazan aıynda Nıderland fýtbolshylary gol soqqan eken.

Endi Italııa quramasy 26 maýsymda Londonda ótetin 1/8 fınal básekesinde S tobynda ekinshi orynǵa jaı­ǵasatyn Ýkraına nemese Aýstrııamen kez­desedi.

Aıta keteıik, 2016 jy­ly Fransııada uıym­das­tyrylǵan Eýropa chempıonatynda da Italııa qu­­ramasy toptyq ke­zeń­di birinshi orynmen aıaq­tap, shırek fınalda Ger­manııadan match sońyndaǵy penaltı se­rııasynda je­ńilip qalǵan edi.

Túrkııa toptyq kezeńnen shyǵa almady

Ázerbaıjan as­ta­nasy – Ba­kýdegi Olım­­pıadalyq stadıonyn­da ót­ken oıynda mańyzdy joldamaǵa ta­las­qan Shveısarııa men Túrkııa matchy aldyńǵy quramanyń iri jeńisimen aıaqtaldy. Shveısarııa qu­rama­synan Harıs Seferovıch jáne Djerdan Sha­kırı (dýbl) mergendigimen kózge tús­se, Túr­­kııanyń jalǵyz golyn Irfan Kah­fedjı soqty. Bul – Túrkııanyń bıylǵy Eýrodaǵy birinshi jáne eń sońǵy goly.

Degenmen statıstıkalyq kór­set­kish boıynsha, eki quramanyń kúshi teń tústi. Soqqylar boıynsha shveı­sarııalyqtar sál ǵana basymdyqqa ıe boldy – 23:19 (týra soqqylar – 10:6). Al dopqa ıelik etý bo­ıyn­sha kúshter teń tústi – 51 paıyzǵa 49 paıyz. Pas­tar­dyń dáldigi boıynsha eki qurama da birdeı nátıje kórsetti – 86 paıyz. Biraq múmkindikterdi paıdalaný jaǵynan shveısarııalyqtar dáldik tanytty. Seferovıch jyldam gol soǵyp, basymdyqty qoldaryna alsa, keıinnen Shakırı eki gol salyp oıynnyń eń úzdik fýtbolshysy atandy.

Osylaısha, A tobynda birde-bir oıynda jeńilmegen Italııa 9 upaımen kósh bas­tady. Ýels quramasy Ita­lııadan jeńilse de 4 upaımen ekinshi oryn­ǵa taban tiredi. Negizi Ýels pen Shveısarııa ekeýiniń upaıy teń. Biraq dop aıyrmashylyǵy Rob Peıdj komandasynyń paıdasyna. Degenmen Shveısarııa quramasynyń 1/8 fınaldan áli de bolsa úmiti bar. О́ıtkeni úshinshi oryn alǵan eń úzdik 4 ujym jıǵan upaı men qosym­sha kórsetkishterine baılanysty pleı-off ke­zeńine shyǵa alady. Ázir­she Shveısarııa bul tizimde birinshi orynda tur.

Shenol Gıýnesh jat­tyqtyratyn Túrkııa qu­ramasy Eýropa chempıo­natynda soqyr upaı jınaı almaı, eline abyroısyz qaıtatyn boldy. Túrkııa 1996 jyldan keıin alǵash ret Eýrododanyń fınaldyq kezeńiniń toptyq básekesinde upaı ala almaǵan Eýropadaǵy jalǵyz qurama bolyp tur. 1996 jylǵy Anglııada ótken týrnırde de quramynda Hakan Shúkir, Búlent Qorqmaz, Rýshtý Rýj­ber sekildi juldyz fýtbolshylary bar Túrkııa úsh oıynnyń bárinde jeńilgen edi. Birinshi týrda Horvatııadan (0:1), ekinshi týrda Portýgalııadan (0:1), úshinshi týrda Danııadan (0:3) utylǵan bolatyn.

Al 2016 jylǵy Eýroda Anadoly eliniń fýtbolshylary Chehııany 2:0 ese­bimen jeńip, Ispanııa men Hor­va­tııadan 0:1 esebimen utylyp qalǵan edi.