Máselen, halyqaralyq «Almaty-Ekaterınbýrg» tasjolynyń Jaqsy aýdanyn basyp ótetin «Jaqsy-Chıstopole» aralyǵyn qalpyna keltirý jumystary bastalyp ketti. Aýqymdy jobanyń quny 16 mlrd teńgege taıaý. Sóz arasynda joldyń jaqsarýyna «Aýyl – el besigi» baǵdarlamasynyń sharapaty tıip turǵandyǵyn aıta ketkenimiz oryndy bolmaq. Baǵdarlama aıasynda 304 mln teńge bólinip, 12 shaqyrym jol jóndeldi. Ekinshi lekpen 357 mln teńge qarastyrylyp, baıqaý jarııalandy. Keıingi qarjyǵa 4 eldi mekendi jalǵastyratyn, uzyn-yrǵasy 29 shaqyrymdy quraıtyn jol jóndelmek.
– Bul jol kópten kútim kórmegendikten, ábden tozyǵy jetken bolatyn. Onyń ústine kóktem men kúzgi laısań ýaqytta aýyr júk artqan tehnıkalar tasjoldyń tas-talqanyn shyǵarady. 2019 jyldyń jeltoqsan aıynda jol jóndeý jobasy saraptamadan ótkizildi, – deıdi Jaqsy aýdandyq qoǵamdyq kólik jáne avtomobıl joldary bólimi basshysynyń mindetin atqarýshy Dýlat Janbaev, – jobanyń jalpy quny 15,9 mlrd teńgeni quraıdy. Ústimizdegi jylǵy atqarylýǵa tıisti jóndeý jumysyna 450 mln teńge qarajat bólinip otyr. «Jaqsy-Chıstopole» aralyǵy bes eldi mekendi aýdanmen jalǵaıdy. Sondyqtan óte mańyzdy ınfraqurylym sanalady.
Kópten beri kútim kórmegen kúre joldardyń jóndelýi aýyl sharýashylyǵy qurylymdaryn da qýantyp otyr. Ásirese, kúzgi jıyn-terin kezinde negizinen altyn astyq ósiretin óńirdiń júrgizýshileri tehnıkanyń jıi isten shyǵatynyn aıtyp, shaǵymdanatyn. Endi kóktemgi egis, oraq naýqany kezinde dittegen jerine jetý úshin irkilis bola qoımaıdy.
Jaqsy jol shyn máninde tirshiliktiń tynysyn keńeıtýge septigin tıgizedi. Mundaı jumys Birjan sal aýdanynda da qolǵa alynýda. Júk tasymaly dálizin jaqsylap jóndep, qalypqa keltirýge 2 mlrd teńge qarajat bólinip otyr. Tozyǵy jetken tasjol aýdannyń ekonomıkasyna da keri áserin tıgizip kelgen bolatyn. Bul óńirdegi óndiris alyby bolyp esepteletin «Kókshe Sement» zaýytynyń júk kólikteri «Keńashy-Stepnıak-Shýchınsk» baǵyttary boıynsha qurylys materıaldaryn úzdiksiz tasymaldaıdy. Qurylys jumystary qyza túsken jaz aılarynda joldyń jaısyz bolýy qurylysshylardyń da qolyn baılaıdy. Endi jol jaıy kóp-kórim jaqsara ma degen úmit oty laýlap tur. Qajetti joba jasalǵan. «Shýchınsk-Stepnıak», «Stepnıak-Keńashy» baǵyttaryndaǵy jol kúrdeli jóndeýden ótkizilse, «Keńashy-Eńbekshilder» baǵytyndaǵy tasjol ortasha deńgeıde jóndeledi.
– Bul joldarǵa tipten ókpe joq, – deıdi Birjan sal aýdandyq qoǵamdyq kólik jáne avtomobıl joldary bóliminiń basshysy Qanat Imanqulov, – osydan qyryq-elý jyl buryn salynǵan. Búgingideı aýyr salmaqqa eseptelmegen.
Aýdanda 345 shaqyrym aýdandyq mańyzdaǵy jol bar. Qansha talaptanǵanymen, 311 shaqyrym jolǵa áli kúnge deıin asfalt tóselmegendigin ekpin túsirip aıta ketken lázim. Ázirge bar joldyń 40 paıyzyn jóndeý úshin arnaıy qujat ázirlenýde. Aýdan ortalyǵy – Stepnıak qalasynda 12 kóshe men 6 jaıaý júrginshi jolyn kúrdeli jóndeýden ótkizý úshin jalpy quny 450 mln teńge bolatyn joba daıyndalýda. Bıyl qajetti qarjynyń 300 mln teńgesi bólinipti.
Áli de el ishinde jóndeýdi qajet etetin jol jetip artylady. El eńsesin kóterýge septigin tıgizetin bar jaı nazarda bolǵany lázim.
Aqmola oblysy
