Qaldybaı Jaılaýuly 1941 jyly 29 maýsymda Ońtústik Qazaqstan oblysy, Saıram aýdany, Qarabulaq aýylynda dúnıege kelgen.
1965 jyly S.M.Kırov atyndaǵy Qazaq memlekettik ýnıversıtetiniń hımııa fakýltetin úzdik bitirdi. Organıkalyq hımııa salasynda jańashyldyq jasaýǵa barynsha kúsh salyp, 1970 jyly kandıdattyq dıssertasııa, al 1991 jyly doktorlyq dıssertasııa qorǵap, 1992 jyly professor ataǵyn aldy. 2004 jyldan Qazaqstan Respýblıkasy Ulttyq Ǵylym akademııasynyń akademıgi atandy jáne bas dırektordyń orynbasary boldy.
Talantty jáne hımııaǵa beıimi baryn baıqaǵan professor D.V.Sokolov kandıdattyq dıssertasııany qorǵaǵannan keıin jas ǵalymdy KSRO ǴKNT-nyń joǵary tıimdi analgetıkterdi-sıntetıkalyq morfındi almastyrǵyshtardy izdeý jónindegi aýqymdy taqyrybynyń jaýapty oryndaýshysy etip taǵaıyndady. Bul Qaldybaı Jaılaýulynyń Qazaqstanda jáne TMD elderinde, sonymen qatar shet memleketterde de tanymal kórnekti organık-hımık, ǵylymdy uıymdastyrýshy, qoǵam qaıratkeri retinde qalyptasýynyń bastamasy boldy.
Akademık Q.J.Pirálıev mektebiniń sońǵy kezderdegi úlken jetistikteri esirtki emes kúshti analgetıktik áserlerge ıe jáne apıynǵa antagonıstik belsendilik kórsetetin zattar alynýy.
Qaldybaı Jaılaýuly ómirden toqyǵany mol, keń oılap, qamqor qolyn usynyp júretin aıaýly jan, ozyq oılaıtyn, jany jomart, qamqor da talapshyl basshy, ulaǵatty ustaz retinde belgili. Isker basshylyq, adamgershilik qarym-qatynas, talmaı izdenýler men jańalyqqa degen qushtarlyq óz nátıjesin berip, ol alys-jaqyn shetelderge keńinen belgili, tanymal ǵalym atandy. UǴA akademıgi Q.J.Pirálıevtiń TMD elderiniń medısınalyq praktıkasyna jańa tıimdiligi joǵary jáne biregeı dárilik zattardy engizýge baǵyttalǵan belsendi ınnovasııalyq qyzmetin erekshe atap ótken jón. Antıdepressant SEFEDRIN jáne eń az narkogendik potensıaly bar morfındi almastyrýshy ortalyq analgetık – PROSIDOL alynyp, medısınalyq praktıkaǵa engizildi, olardyń ónerkásiptik óndirisi ıgerildi. Sondaı-aq Máskeýdiń jetekshi klınıkalarynda klınıkalyq synaqtardyń birinshi kezeńinen sátti ótken jergilikti anestetık jáne antıarıtmııalyq KAZKAIN erekshe qyzyǵýshylyq týdyrdy.
Q.J.Pirálıev árqashan hımııa ǵylymdary ınstıtýtynda ǵana emes, búkil eldiń qoǵamdyq jáne ǵylymı-uıymdastyrýshylyq qyzmetiniń ortasynda júr. Kóptegen jyldar boıy ol «Á.B. Bekturov atyndaǵy hımııa ǵylymdary ınstıtýty» AQ ǵylymı keńesiniń tóraǵa orynbasary, Instıtýttyń dıssertasııalyq keńesiniń tóraǵasy jáne orynbasary, UǴA hımııa – tehnologııalyq ǵylymdar bólimshesi Bıýrosynyń múshesi, túrli ǴTK jáne túrli ǵylymı jýrnaldardyń redaksııalyq alqasynyń múshesi, respýblıkalyq irgeli zertteýler keńesiniń múshesi, qazirgi ýaqytta Q.J.Pirálıev – BǴM Bilim jáne ǵylym salasyndaǵy baqylaý komıteti prezıdıýmynyń jáne UǴA Prezıdıýmynyń múshesi.
QR UǴA akademıgi Q.J.Pirálıev basshylyǵymen 8 doktor, 34 ǵylym kandıdaty jáne 3 hımııa ǵylymdary boıynsha fılosofııa PhD doktory daıyndaldy.
Akademık Q.J.Pirálıev 1986 jyly QazKSR Mınıstrler keńesiniń syılyǵyna, 2002 jyly akademık Q.I.Sátbaev atyndaǵy, 2003 jyly QR Memlekettik syılyqtarynyń laýreaty atandy. Qaldybaı Jaılaýulyna 2001 jyly «Qazaqstan Respýblıkasynyń táýelsizdigine 10 jyl» medali, 2002 jyly Qazaqstan Respýblıkasynyń ǵylymynyń damýyna qosqan úlesi úshin» tósbelgisi, 2016 jyly «Qazaqstan Respýblıkasynyń eńbek sińirgen ónertapqyshy» ataǵy jáne 2021 jyly «Eńbek ardageri» tósbelgisi berildi.
Júırik ýaqyttyń ushqyr qanaty UǴA akademıgi Q.J.Pirálıevti maǵynaly ǵumyrdyń bıik bir belesi – 80 jasqa alyp jetti. Osy kemeldikke jiger, jarqyn kóńilmen kelip otyr.
Mereıtoı – júrip ótken joldy baǵalaýǵa múmkindik beretin tamasha shyń!
«Á.B.Bekturov atyndaǵy hımııa ǵylymdary ınstıtýty» AQ-nyń bas dırektory, hımııa ǵylymdarynyń kandıdaty Dámetken Fısher jáne ujymy UǴA akademıgi Q.J.Pirálıevti 80 jas mereıtoıymen shyn júrekten quttyqtaı otyryp, zor densaýlyq jáne Qazaqstannyń hımııa ǵylymynyń ıgiligi úshin jańa shyǵarmashylyq tabystar tileıdi.
