Ulttyq quramanyń bapkerleri aqyldasyp, Ǵusman Qyrǵyzbaevty (60 keli) álem birinshiligine, al Eldos Smetovty Olımpıada oıyndaryna jiberýdi jón sanaǵan.
«Eki sportshymyzdy eki mańyzdy jarysqa arnaıy daıyndadyq. Ǵusman Qyrǵyzbaev Býdapeshtte úmitimizdi aqtap, álem chempıonatynyń kúmis júlesine ıe boldy», dedi bas bapker.
Al 66 kelide Eldos Jumaqanov pen Erlan Serikjanovtyń arasyndaǵy báseke óte tartysty júrdi. Bes jylǵa sozylǵan olımpıadalyq sıklde eki dzıýdoshyǵa birdeı múmkindik berilip, álemdik jarystarǵa qatar shyqty.
«Álem chempıonatynyń aldynda dál osy salmaq boıynsha da bapkerlermen aqyldasyp, Tokıoǵa baratyn sportshyny álem chempıonatynan keıin belgili bolady dep tarqasqanbyz. О́zderińiz kórgendeı, Eldos Jumaqanov álem birinshiliginiń jartylaı fınalyna deıin jetip, jarysta besinshi boldy. Júldegerler qatarynan kóringende, sózsiz, Eldos olımpıadalyq reıtıngte aldyńǵy qatarǵa shyǵatyn edi. Alaıda, jaraqatyna baılanysty ol jartylaı fınalda toqtady», deıdi Ǵalymjan Jylgeldıev.
Qazir 66 kelide Erlan Serikjanov reıtıngte joǵary tur. Sondyqtan osy salmaq boıynsha Erlan Serikjanov Tokıo Olımpıadasynda el namysyn qorǵaıdy.
Al qalǵan salmaqtar boıynsha reıtıngte tıisti upaı enshilegen balýandar Tokıoǵa attanady.
73 kelige deıingi salmaq dárejesinde Jansaı Smaǵulov, 90 kelide Islam Bozbaev Olımpıada oıyndaryna qatysady. 81 kelige deıingi salmaq dárejesinde Dıdar Hamza qurlyqtyq kvotaǵa ıe boldy.
Osylaısha, Tokıo Olımpıadasyna erler quramasynan jalpy sany bes dzıýdoshy qatysady. Olar: Eldos Smetov (60 kg), Erlan Serikjanov (66 kg), Jansaı Smaǵulov (73 kg), Dıdar Hamza (81 kg) jáne Islam Bozbaev (90 kg).
