Saýda jáne ıntegrasııa mınıstrligi Tehnıkalyq retteý jáne metrologııa komıtetiniń habarlaýynsha, zań jobasyn ázirleý kezinde qaýipti ónimdi Qazaqstan naryǵyna aınalymǵa shyǵarmaýǵa basymdyq berilgen. Osyǵan baılanysty tehnıkalyq retteý jáne metrologııa salasyndaǵy ýákiletti organnyń quzyreti keńeıtilip, oǵan ónerkásiptik jáne ımporttyq ónimderdi baqylaýǵa múmkindik berilgen. Endi ınspektorlar qaýipti ónimderdi dúken sórelerinen izdep jatpaıdy, óıtkeni mundaı ónimderdi naryqqa jetkenge deıin aınalymnan shyǵarý joldary ońtaılana tústi. «Bul zańdaǵy jańashyldyqtyń biri – kameraldyq baqylaý júıesi. Inspektorlar sýbektilerdi baqylaýdan obektilerdi baqylaýǵa kóshti. Osy rette baqylaý sýbektisine (obektisine) barmaı-aq tekseris jasaýǵa bolatyn profılaktıkalyq baqylaý mehanızmi iske qosyldy. Baqylaýǵa alynatyn nysandar 120 ónim tobyna, 180 myń kásipkerlik jáne 1500 akkredıtteý sýbektisine kóbeıdi. Buǵan qosa, taýar shyǵaratyn uıymdardy aıqyndaıtyn saraptama uıymy 40-tan asty. Al aımaqtyq ınspektorlardyń naqty quramy 95 adamdy qurady», deıdi komıtettiń baspasóz hatshysy Roza Áýbákirova.
Kameraldyq baqylaýdyń maqsaty – baqylaý men qadaǵalaý sýbektisine anyqtalǵan buzýshylyqty shuǵyl joıý quqyǵyn berý, zańsyz árekettiń jolyn kesý jáne onyń aldyn alý. Zań buzýshylyq anyqtalǵan sátte avtomatty túrde dabyl qaǵylyp, júıe arqyly baqylaý sýbektisine elektrondy habarlamalar kelip túsetindeı múmkindikter qarastyrylady. «Júıege engiziletin sıfrly platforma qysqa merzim ishinde ónimderdi synaqtan ótkizedi, sarapshy-aýdıtordyń ónimge júrgizgen tekserisin sertıfıkattap beredi jáne qandaı da bir zań buzýshylyq bolsa, birden dabyl iske qosylady. Jalpy bolashaqta memlekettik organdardyń osyǵan uqsas júıelerimen bazany biriktirý josparda bar. Eger kameraldyq baqylaýdyń aıasy keńeıse, baqylanatyn salalardaǵy zań buzýshylyqtar avtomatty túrde anyqtalady», delingen baspasóz habarlamasynada.
Sonymen qatar biryńǵaı aqparattyq júıe sheńberinde tehnıkalyq retteýdiń barlyq prosesin avtomattandyrý kózdelip otyr. Jalpy alǵanda, búginge deıin 90-nan astam bıznes-prosess, tehnıkalyq retteý men standarttaý jáne metrologııa memlekettik júıeleri avtomattandyrylǵan.
Bul júıege QazStandart, UAO, sertıfıkattaý organdary, zerthanalar, tehnıkalyq komıtetter, oqý ortalyqtary, taǵy basqalar engiziledi.
– Aqparattyq júıeniń negizgi mindeti – «sur» sertıfıkattaýdy joıý, sertıfıkattaý prosesterin qadaǵalaýdy qamtamasyz etý, avtomattandyrý men sıfrlandyrýǵa jaǵdaı jasaý. Osylaısha, sáıkestikti baǵalaýǵa ótinimderdi qaraý ýaqytyn qysqartýǵa qol jetkize alamyz, – deıdi R.Áýbákirova.
Erteńnen bastap kúshine enetin «Tehnıkalyq retteý týraly» Zańnyń halyqqa paıdasy qandaı? Tehnıkalyq retteýdiń basty qaǵıdaty – adam ómiri men densaýlyǵyn qorǵaý jáne qorshaǵan orta, sonyń ishinde ósimdikter men janýarlar dúnıesi úshin ónimderdiń, prosesterdiń jáne kórsetiletin qyzmetterdiń qaýipsizdigin qamtamasyz etý. Demek ónimniń kórsetiletin qyzmettiń qaýipsizdigi men sapasyna barynsha kepildik berýge múmkindik jasalady. Sondaı-aq zańdaǵy qaǵıdattar saýdadaǵy tehnıkalyq kedergilerdi joıyp, satyp alýshylarǵa sapaly ónim men joǵary deńgeıdegi qyzmetterdi tańdaýǵa járdemdesedi. Bir sózben aıtqanda, tutynýshy satyp alǵan óniminiń sapasyna senimdi bolady. Tehnıkalyq reglament boıynsha tek tıisti talaptardan ótken, qaýipsizdigi dáleldengen ónimder ǵana ishki naryqta satylady.
Al kameraldyq baqylaý arqyly anyqtalǵan zań buzýshylyqtar boıynsha aqparattyq júıe ýákiletti organǵa shara qoldanýǵa sıgnal beredi, bul tehnıkalyq reglamentter talaptaryn oryndaý jolyndaǵy memlekettik baqylaýdy jetildirip, tehnıkalyq retteý salasyndaǵy quqyq buzýshylyqtar úshin ákimshilik jaýapkershilikke tartýdyń merzimin arttyrady jáne akkredıtteý sýbektilerine júrgiziletin tekserýlerdiń erekshe tártibin engizýge múmkindik beredi.
