Tokıo olımpıadasyna Qazaqstannan qansha sportshy qatysady?

Tokıo Olımpıadasy 23 shilde kúni bastalady jáne tórtjyldyqtyń basty dodasynda barlyǵy 339 medal jıyntyǵy sarapqa salynady.  

«Ulttyq Olımpıadalyq komıtet sportshylar men jattyqtyrýshylarǵa Olımpıadaǵa degen armandaryna adaldyq tanytyp, tynymsyz jumys istep, talmaı eńbektengeni úshin alǵys bildiredi. Osy oraıda ulttyq sport federasııalarynyń, keshendi ǵylymı top mamandarynyń, sport menedjerleriniń qajyrly jumysyn atap ótken jón. Olar óz sport túrleri boıynsha joldamany jeńip alýǵa jáne Olımpıada oıyndaryna úzdik sportshylardyń attanýyna barynsha kómektesti. Olımpıadalyq otbasy úshin Tokıo Olımpıadasyna deıingi sońǵy eki jyl ońaı bolǵan joq. Soǵan qaramastan qazaqstandyq sportshylar ózderine, komandaǵa degen senimderin joǵaltpady jáne ózderiniń kórsetkishterin jaqsartýmen jattyǵýlaryn jalǵastyrdy. Tipti osyndaı jaǵdaıǵa qaramastan biz barynsha múmkindikti keńeıtip, Tokıoǵa el namysyn abyroımen qorǵaıtyn sportshylardy jasaqtadyq. Barlyq Olımpıadalyq otbasynyń atynan Memleket basshysyna jáne el Úkimetine qazaqstandyq sportshylardy qoldap, barlyq qajetti jaǵdaıdy jasaǵany úshin alǵys aıtqym keledi», dedi Qazaqstan UOK Prezıdenti Tımýr Qulybaev.

Qazaqstan birinshi ret Olımpıada baǵdarlamasyna jańadan engen sport túrleri, atap aıtqanda, sporttyq quzǵa órmeleý jáne karate boıynsha qatysady. Karate boıynsha birden bes sportshy, erlerden Darhan Asadilov, Nurqanat Ájiqanov, Danııar Iýldashev pen áıelderden Móldir Jańbyrbaı men Sofıa Berýlseva, al quzǵa órmeleýden Rıshat Haıbýllın baq synaıdy.

Tanymal qazaqstandyq jeńil atlet Olga Rypakova otandyq olımpıadalyq quramnyń kóshbasshysy bolatyny sózsiz. Bul doda  Olganyń sport mansabyndaǵy tórtinshi Olımpıadasy bolmaq. Búginde onyń qorjynynda olımpıada medaldarynyń tolyq jıyntyǵy bar. Osyǵan deıingi qatysqan barlyq Olımpıada oıyndarynda ol júldemen oralǵan edi.

Sý dobynan erler quramasy komandalyq oıyn túrlerinen jarysqa qatsatyn qazaqstandyq jalǵyz qurama bolyp otyr. Olar Olımpıada oıyndaryna segiz jyldan keıingi úzilisten soń oraldy.

Dástúr boıynsha Qamshybek Qońqabaev bastaǵan bokstan erler komandasy tolyq qurammen, segiz salmaq boıynsha qatysady. El qorjynyndaǵy toǵyz joldama boksshylarǵa tıesili.

Gımnast Mılad Karımı jalǵyz ózi jeti joldamany enshilep, irikteý kezeńin sátti aıaqtady.

Júzýden biz úsh joldamany ıelendik. Onyń ekeýi Olımpıada chempıony Dmıtrıı Balandınge tıesili.

Otandasymyz Rýslan Qurbanov Halyqaralyq semserlesý federasııasynyń jeke reıtıngi boıynsha qurlyqtyq kvotany jeńip alǵan alty sportyshynyń qataryna endi. Afınydaǵy Olımpıada oıyndarynan keıin (2004) alǵash ret Qazaqstannyń úsh veloshabandozy toptyq jarysta baq synaıdy. Mundaı nátıjege qol jetkizýge  komanda kóshbasshysy Alekseı Lýsenko úlken úles qosty. Ol Qazaqstanǵa jalpy alǵanda Azııa qurlyǵynyń birde-bir memleketi enshilemegen upaıdy ákeldi. Trektegi velosport (sprınt, omnıým jáne keırın) boıynsha úsh lısenzııa jeńip aldy. Aıta keterligi, sporttyń bul túri boıynsha joldama Qazaqstan úshin tarıhı bolyp esepteledi. Sebebi, osy ýaqytqa deıin qazaqstandyq sportshylar atalǵan dıssıplına boıynsha Olımpıada oıyndaryna qatyspaǵan.

Sadaq atýdan 20 jyldan keıin alǵash ret Qazaqstannan úsh sadaqshy Olımpıada oıyndarynda komandalyq jarysqa qatysady.

Búginde on bir joldama balýandarǵa tıesili bolsa, jeńil atletter de osy mólsherde lısenzııa jeńip aldy. Tennısshiler jeti, al baıdarka men kanoede esýden alty joldama qorjynda. Reıtıngtik jarystar nátıjesi boıynsha dzıýdoshylar alty joldamany ıelendi. Tokıo tórinde beldesetin tatamı sheberleriniń arasynda tájirıbeli Eldos Smetov bar. 

Ústel tennısinen Qazaqstan quramasynyń enshisinde qos joldama, sondaı-aq, taekvondo men slalomdy esý boıynsha sportshylar eki lısenzııa aldy.

Qazirgi tańda UOK keıbir sport túrlerinen halyqaralyq federasııalardyń lısenzııalardy qaıta bólý, úlestirý nátıjelerin kútýde.

Olımpıada oıynaryna qatysatyn sportshylardyń sońǵy ári naqty tizimi 5 shildeden keıin belgili bolady.

Qazaqstandyq delegasııanyń basym bóligi eki aptalyq karantınnen keıin Qazaqstannan Tokıoǵa attanady. Birinshi oryndaǵy mindetimiz sportshylardyń qaýipsizdigi, dep atap ótti Ulttyq Olımpıada komıteti.

Endi mańyzdy mindetterdiń biri Olımpıada oıyndary bastalar aldyndaǵy sońǵy kúnderdi uıymdastyrý jáne materıaldyq-tehnıkalyq jaǵynan qamtamasyz etý bolyp qala beredi. Tokıo Olımpıadasynyń Uıymdastyrý komıteti men Halyqaralyq Olımpıada komıteti Olımpıadaǵa qatysýshylardyń densaýlyǵyna qaýip tóndirmeý jáne aldyn alý úshin buryn-sońdy bolmaǵan sharalardy júzege asyrdy. Atap aıtqanda, qatysýshylarǵa arnaıy erejeler jıyntyǵyn «Pleıbýkty» shyǵardy. Mundaı sharaǵa sportshylardyń jáne delegasııalardyń basqa músheleriniń qozǵalysyn shekteý, UOK-tan jáne halyqaralyq federasııalardan delegasııalardyń sanyn qysqartý, kúndelikti PTR-testileri jáne Olımpıada oıyndaryna qatysýshylardyń ornalasqan jerin arnaıy mobıldi qosymshalar arqyly únemi qadaǵalaý kiredi. Komanda Japonııaǵa 16 shildede «Air Astana» kompanııasynyń qoldaýymen uıymdastyrylǵan charterlik reıspen ushady.

Olımpıada oıyndarynyń ashylý saltanaty 23 maýsymda Tokıo Olımpıada stadıonynda ótedi.