QR BǴM baspasóz qyzmetiniń habarlaýynsha, baıqaýǵa Aqtóbe men Shymkent qalasynan úsh oqýshy qatysqan. Ulttyq quramany jarysqa geografııa ǵylymdarynyń doktory, ál-Farabı atyndaǵy QazUÝ professory G.Núsipova daıyndady.
Olımpıada jazbasha jáne mýltımedııalyq testter men praktıkalyq týrlardan turdy. Nátıjesinde, Qazaqstan quramasy qorjynyna 2 medal enshiledi. Valeev Rýstam - kúmis, Tazabek Erkebulan qola medaldy ıelendi. Qazaqstandyq úshinshi qatysýshy Muqanov Beıhan sertıfıkat aldy.
«Eýropalyq olımpıada oqýshylardyń geografııa jáne ekologııa salasyndaǵy zertteýlerge degen qyzyǵýshylyǵyn arttyrady. Zııatkerlik jarys 2021 jyly jas geograftar úshin alǵashqy synaq jáne tamyz aıynda ótetin halyqaralyq olımpıadaǵa qatysý úshin tramplın boldy», deıdi QR BǴM Mektepke deıingi jáne orta bilim komıtetiniń tóraıymy Maıra Meldebekova.
Bul zııatkerlik jarysqa Qazaqstan úshinshi ret qatysty. О́tken jyly qazaqstandyq oqýshylar bir kúmis jáne bir qola jeńip aldy.
