«Jasyl soqpaq» – eń bedeldi konkýrstyń biri. Oǵan Baltyq teńizinen Tynyq muhıtqa deıingi aralyqta ornalasqan Reseı Federasııasynyń barlyq okrýgi arnaıy maqsattaǵy bólimsheleriniń komandalary, sondaı-aq UQShU elderiniń arnaıy maqsattaǵy bólimsheleri qatysady.
Saıys 20-dan astam kezeńdi qamtıdy. Barlaýshylar alys qashyqtyqqa jyljý, sý kedergisinen ótý, arnaıy mindetti oryndaý, jaýyngerlik oq atý jáne barlaý tobyn qarsylas tylyna shyǵarý kezinde toptardyń áreket etýin pysyqtaý saıysyna túsedi. Jarystyń barlyq kezeńin oryndaýǵa 100 saǵat bólinedi. Mindet toqtaýsyz oryndalady. Beriktik pen tózimdilikti anyqtaıtyn basty synaq – 10 jáne 30 kılometr qashyqtyqta júgirý.
Jarystyń sońǵy kezeńinde qatysýshylar shartty qarsylastyń dıversııalyq toptaryn torýyldap, olardyń shabýylyna toıtarys beredi.
Qorytyndylaý kezinde barlaýshylardyń áskerı topografııa salasyndaǵy bilimi, búrkemeleý, jasyryn jyljý sheberligi, lagerdi uıymdastyrýy, medısınalyq jáne ınjenerlik daıarlyq daǵdylary eskeriledi.
Barlaýshylar konkýrsqa qatysa otyryp, ártúrli óńirde, tabıǵı jáne klımattyq jaǵdaılarda jaýyngerlik is-qımyldardy júrgizýde tájirıbe jınaqtaıdy. Bıylǵy jyly 47-shi ret ótkizilip otyrǵan «Jasyl soqpaq» saıysy 2 shildeden 13 shildege deıin jalǵasady.
«Egemen-aqparat»
