Tokıo tórinde óner kórsetetin tennısshilerimizdiń sany altyǵa jetti.
Zarına Dıasqa osyndaı qurmet tegin kórsetilip otyrmaǵany anyq. 27 jastaǵy jerlesimiz Almatyda týǵanymen balaýsa kezinen sheberligin Chehııada shyńdady. 1999 jyly onyń áke-sheshesi qyzmet babymen atalmysh memlekette eńbek etti. Sol jaqtaǵy jergilikti akademııalardyń birinde tennıstiń qyr-syryna qanyqty. Ýaqyt oza Dıas dara talantymen oqshaýlanyp, óz qatarynyń aldy boldy. Halyqaralyq arenada eleýli tabystarǵa jete bastaǵan shaǵynda Qazaqstannyń ulttyq quramasyna shaqyrtý aldy. Jyldan jylǵa nátıjesi jaqsara túsken Zarına 2015 jyldyń basynda álemdik reıtınte 31-orynǵa kóterildi. Bul onyń sporttyq karerasyndaǵy eń zor kórsetkish.
2014 jyldan beri Dıas «Úlken dýlyǵa» sanatyndaǵy týrnırlerge úzdiksiz qatysyp keledi. Ázirge onyń eń úzdik nátıjesi – 2014 jáne 2015 jyldary qatarynan eki márte «Ýımbldonnyń» tórtinshi kezeńine deıin jetýi. Odan bólek, Zarına birneshe ret Aýstralııa men AQSh-tyń ashyq birinshilikteriniń úshinshi aınalymynda óner kórsetti. Al juptyq saıysta otandasymyz Nıý-Iorktegi týrnırdiń shırek fınalynda kúsh synasty. Barlyǵy ol WTA jarysynda bir márte jeńimpaz atanyp, ITF dodasynda 8 ret dara shyqty.
Biraz ýaqyttan beri aıshyqty oıyn órnegimen kózge túsip júrgen Zarına Dıas kezinde chehııalyq Petra Kvıtova, argentınalyq Hısela Dýlko, serbııalyq Elena Iаnkovıch, shveısarııalyq Belında Benchıch, reseılik Vera Zvonareva men Svetlana Kýznesova, ıspanııalyq Karla Sýares-Navarro jáne taǵy basqa álemge áıgili tennısshilerge tize búktirgenin jankúıerler jaqsy biledi.
Al bıyl jerlesimiz Maıamıdegi týrnırde AQSh-tyń aty ańyzǵa aınalǵan oıynshysy, «Úlken dýlyǵa» sanatyndaǵy jarystardyń 23 dúrkin (7 ret jekelegen+14 ret juptyq+2 ret aralas juptar saıysy) jeńimpazy Vınýs Ýılıamstan aılasyn asyryp, óreli ónerimen san mıllıon kórermendi tamsandyrdy. Qazirgi kezde Dıas WTA tiziminde 101-oryndy ıelenýde. Árıne, bul qalyń qazaq jankúıerleri kútkendeı nátıje emes. Jerlesimizdiń áleýeti budan áldeqaıda zor ekenin dúıim jurt jaqsy biledi. Olaı bolsa, aldaǵy jarystarda Zarınanyń kórsetkishi áldeqaıda jaqsara túsetinine senimimiz zor.
Zarına Dıastan bólek, Tokıo Olımpıadasynyń jekelegen saıystarynda Aleksandr Býblık, Iýlııa Pýtınseva, Elena Rybakına, Iаroslava Shvedova jáne Mıhaıl Kýkýshkın synǵa túsedi. Sonymen qatar aıtýly básekede Andreı Golýbev pen Aleksandr Býblık jáne Elena Rybakına men Iаroslava Shvedova juby da óner kórsetedi. Qazaqstannan osynshama kóp oıynshy buryn-sońdy tórtjyldyqtyń basty dodasynda baq synaǵan joq edi. Bul otandyq tennısimizdiń órlegeniniń jarqyn bir kórnisi. Osy órenderimizdiń biri Tokıo kortynda asqan sheberlik tanytyp, jeńis tuǵyryna kóterilse nur ústine nur bolar edi.
Ǵalym SÚLEIMEN,
«Egemen Qazaqstan»
