«Nur Otan» partııasynan aýyldyq okrýg ákimine kandıdattyqqa tirkelgen Nurbolat Jalǵas 2013 jyldan beri Muǵaljar aýdany Qaıyńdy aýyldyq okrýginde bas maman bolyp jumys isteıdi. Jasy 30-da. Saılaýaldy baǵdarlamasyna Altyndydaǵy ambýlatorııaǵa kúrdeli jóndeý júrgizip, mektep qurylysyn aıaqtaýdy, Altyndy men Qaıyńdy eldi mekenderindegi elektr jelilerin almastyryp, «Embi–Altyndy» avtokólik jolyna ortasha jóndeý júrgizýdi engizgen.
Muǵaljar aýdanynyń Qaıyńdy aýyly oblys ortalyǵynan 270 shaqyrymda ornalasqan. Okrýgke Altyndy jáne Qaıyńdy aýyldary kiredi.
Qaıyńdy aýylynyń turǵyndary Májilis depýtaty Zúlfııa Súleımenovaǵa uzyndyǵy 56 shaqyrym bolatyn «Altyndy-Embi» tasjolyn jóndeýge yqpal etýin surady. Turǵyndardyń aıtýynsha, «AltynEx Company» JShS-niń aýyr júk kólikteri aýylishilik joldy ábden tozdyrǵan. Jaz boıy jolda kóterilgen shań kólik júrgizýshilerine joldaǵy kórý qashyqtyǵyn qıyndatyp, tereń oı-shuqyrlary jeńil kóliktiń qozǵalysyna ábden qıyndyq keltirgen. Zúlfııa Súleımenova Qaıyńdy aýyly turǵyndarynyń talabyn Altyndyda «AltynEx Company» JShS-i mekemesi ǵımaratynda ótken kezdesýde kompanııa basshylyǵyna jetkizdi. Májilis depýtaty aýylishilik qatynas jolyn retke keltirip, ortasha jóndeý jumystaryn júrgizýdi kompanııa basshylyǵyna tapsyryp, osy suraqty únemi qadaǵalap otyratynyn jetkizdi.
Aıta ketý kerek, 14 shildeden bastap aýdandyq mańyzy bar qalalardyń, aýyldar men kentterdiń jáne aýyldyq okrýg ákimderin saılaýdyń úgit-nasıhat naýqany bastaldy. Aqtóbe oblysynda aýyldyq okrýgter ákimdigine 107 kandıdat tirkelse, onyń 17-i áıelder. 65 kandıdat alty saıası partııadan, 42 adam ózin-ózi usyný jolymen tirkeldi. Partııalyq tizim boıynsha «Nur Otan» partııasynan - 28, «Aýyl» partııasynan - 16, «Aq jol» partııasynan - 9, «ADAL» partııasynan - 5, Qazaqstan Halyq partııasynan – 5, Jalpyulttyq sosıal-demokratııalyq partııasynan – 2 kandıdat ákim bolýǵa úmitker.
Oblystyq saılaý komıssııasynyń málimetine qaraǵanda, saılaý aldynda bir okrýgke ortasha básekelestik 3 adamnan keledi. Kandıdattardyń eń jasy 27 – de, eń úlkeni –62 jasta.
