Aımaqtar • 18 Shilde, 2021

Qalamyzdyń qonaǵy qatty uıaltty

1103 ret kórsetildi

Jaıyq ózeni jaǵalaýynyń Stella jaq tusy budan bes-alty jyl buryn abattandyrylyp, demalyp otyratyn oryndyqtar ornatylyp, eki jerde tóbesi kúmbezdelgen rotonda boı kóterdi.

Ishki ister departamenti ǵımaratynyń terezeleri osy rotondarǵa jáne burynǵy jaǵajaıdyń aýmaǵyna tónip tur. Dál osy jerde qalalyq ákimdiktiń atynan qoqys tastaýǵa qatań tyıym salynatyny jóninde qańyltyr taqtaıshalar qoıylǵan. Mundaı jaǵdaıǵa jol berilse, jeke jáne zańdy tulǵalarǵa 45-65 myń teńge aralyǵynda aıyppul salynatyny da qosa kórsetilgen.

Bul eskertý belgilerdegi jazbalar aǵaryp, kómeskilenip, jyrym-jyrym bolyp japyrylyp ketipti. Qoǵamdyq tártipti baqylaýǵa tıisti bas departamenttiń terezeleri osy jerge tónip turǵandyqtan da rotonda janynda aıta qalarlyqtaı kúl-qoqys kózge shalyna bermeıdi. Asyqpaı tura turyńyz... Jaǵa­laýdaǵy aǵashtardyń arasymen alǵa qaraı taǵy da 50 metr qadam jasap kórińizshi?! Taý demesek te, tóbeshik bolyp úıilgen, jan-jaqqa shashylǵan jaǵymsyz, ıisi múńkigen tamaq qaldyqtary men synǵan shólmek qalbyrlarǵa, kúl qaldyqtaryna tap bolar edińiz.

Departament terezelerinen tasalaý bul ara sál jazyqtaý eken. Sondyqtan da boı jazyp otyrýǵa, tipti qısaıyp jatýǵa bola­tyndaı kishkene keńistik bar. Bulaı bol­ǵany ne kerek, aınalanyń bar­lyǵy qoqys-qaldyqtardyń osha­ǵyna aınalsa. Onyń qaı ýa­qyt­tan beri jınalmaǵanyn dál basyp aıtý qıyn-aq. Áıteýir bas­ty aınaldyryp, júrekti aı­ny­tatyndaı kórinis. Soǵan qara­mastan osy qoqystyń ortasynda otyrǵandardyń qarasy da ájep­táýir kórindi. Olar sýǵa túsip keledi de, ala kelgen azyqtaryn iship-jep bolǵan soń onyń qaldyqtaryn aınalasyna laqtyrýda. Konteıner qoıylsa ǵoı... Biraq bul oıymnan tez qaıttym. О́ıtkeni «Jabaıy jaǵajaıǵa» kim konteıner qoıady.

Osyndaı kóńil kúı jeteginde turǵan meni:

– Sálemetsiz be? Siz jergilikti osy jerdiń turǵynysyz ba? – degen áıel daýsy selk etkizdi. Jalt qarasam, jastary elý-elý bes shama­syndaǵy bir er jáne úsh áıel adam jeńil kıingen kúıinde tereńdigi tizeden ǵana keletin Jaıyq ózeniniń aıdynyna jáne aınaladaǵy qoqys pen qaldyqtarǵa kóz tastap tur eken. Saýalynyń tórkinine qaraǵanda, basqa jaqtan kelgen qala qonaqtary shyǵar dep shamaladym.

– Iá, osy Oral qalasynda turamyn, – dedim.

Beıtanys áıeldiń júzinde tańdaný ma, joq áldebir nár­sege kóńili tolmaýshylyq pa, áıteýir sózben aıtyp jetkizgisiz jabyrqaý shyraı ornaı qaldy da:

– Mynalaryń qalaı? – dep jan­jaǵyndaǵy kúl-qoqystardy nus­qady. Osy sátte jaǵym qarysyp qal­ǵandaı boldy. Qa­pelimde ne dep jaýap qaıta­rarymdy bilmeı tosylyp qaldym da:

– Endi árkimniń turmystyq mádenıeti ártúrli bolady ǵoı, – dep mińgirledim.

Mundaı aıran-asyr kóriniske jeke óz atymnan emes, tutastaı Aqjaıyq jurty atynan jaýap qaıtarý ońaı emes ekendigin tuńǵysh ret túı­sindim. Kádimgideı qınaldym. Budan keıingi az-kem til qatysýdan bilgenim, olar Soltústik Qazaqstan oblysyndaǵy Ertis ózeniniń ja­ǵasynda turatyn qandastarymyz eken. Jaıyq jurtymen quda-qudandaly kórinedi. Oralǵa osy dástúrli rásim jolymen joldary túsipti. Bir shaı iship alǵan soń Jaıyq ózenin tamashalap kórip qaıtýǵa shyqqan betteri eken. Soltústikqazaqstandyqtar jaǵalaýda kóp aıaldamaı, bul jerden tezirek ketýge asyqty.

Mine, osylaısha qalamyzdyń qonaqtary qatty uıaltty. Múmkin joǵaryda qoıylǵan saýal jer­lesterimizge qozǵaý salar, sanasyna sáýle júgirter degen oımen osy joldardy jazýdy jón dep taptym.

ORAL

Sońǵy jańalyqtar

Shymkentte taǵy bir aýdan qurylady

Qoǵam • Búgin, 16:58

Almatyda qant qymbattap barady

Qoǵam • Búgin, 16:45

Dollar baǵamy ósti

Qarjy • Búgin, 16:12

Dollar qymbattady

Qarjy • Búgin, 10:59

Elordada áýe shary qulady

Oqıǵa • Búgin, 10:37

Qarjy mınıstriniń orynbasary taǵaıyndaldy

Taǵaıyndaý • Búgin, 10:24

EQYU Bas hatshysy Qazaqstanǵa keledi

Parlament • Búgin, 09:31

Uqsas jańalyqtar