Olardyń qatarynda Qazaqstan Respýblıkasy Jazýshylar odaǵynyń tóraǵasy Ulyqbek Esdáýletov, bıyl seksenniń seńgirine shyqqan jazýshy Kádirbek Segizbaev, jetpistiń jelkenin qolǵa alǵan qalamger Álibek Asqarov, aqyndar Tynyshtyqbek Ábdikákimov, Baýyrjan Jaqyp, Dáýletkereı Kápuly jáne óńirimizden shyqqan ózge de óleń júıirikteri bar.
Bir kúnge josparlanǵan jyr festıvalin aqyndar men jazýshylar Abaı men Jambyl eskertkishteriniń aldyna gúl shoqtaryn qoıý rásimimen bastady.
– Búgingi uly mereke qutty bolsyn! Uly dep turǵanymnyń da ózindik sebebi bar. Táýelsizdiktiń alǵashqy jyldary О́skemennen qazaqtyń rýhanııatyn izdegendi qoıyp, ózimizdi ózimiz áreń tabatyn edik. Sondyqtan da búgingi bastalyp jatqan rýhanı toıymyzdy táýelsizdiktiń jemisi, uly toı dep bilgen jón. Jalpy, qazaq poezııasyn Abaısyz elestetý múmkin emes, sondyqtan da jyr festıvalin Abaıǵa taǵzym jasaýdan bastap turmyz, – dedi Jazýshylar odaǵy Shyǵys Qazaqstan oblystyq fılıalynyń dırektory, jazýshy Álibek Qańtarbaev.
Aldymen qazaq poezııasynyń alyptaryna qurmet kórsetken jazýshylar men aqyndar ekige bólinip kitaphanalarǵa bet burdy. Ulyqbek Esdeýletov bastap, jalyndy jastar qostaǵan aqyndar Pýshkın atyndaǵy oblystyq kitaphanada bas qosty. Qazaqy dástúrge saı dastarqan basyna jaıǵasqan qalamgerler sóz óneriniń búgini men bolashaǵy jaıly súbeli áńgime órbitti.
– Abaı men Jambyldy О́skemenniń tórindegi tas tuǵyrǵa qondyrǵanymyzben ult bolyp rýhanııatqa moıyn bura qoımaǵan edik. Biz osyndaı rýhanı sharaǵa jeti jyl kútip baryp qol jetkizip otyrmyz. Aımaq basshylyǵy Shyǵystyń altyny men altyn adamyn qazǵanda altyndaı ádebıetine kóńil bólmeı me degen ishteı ókpe de bar bolatyn. Búgin sol ókpe tarqap, úmit oty janǵan tárizdi. Osy aralyqta biraz jas qalamgerlerdiń ósip jetilgenin kórip otyrmyz. Jas qalamgerlerdi biz osyndaı rýhanı sharalar aıasynda qatarǵa qosyp kelemiz, – dedi Jazýshylar odaǵynyń tóraǵasy Ulyqbek Esdáýletov.
Sondaı-aq ol «Abaı álemi» serııasy boıynsha jyl saıyn aqyndar men jazýshylardyń kitaptary jaryq kórip kele jatqanyn aıtty. Jyly lebizdi aqyn Tynyshtyq Ábdikákimov jalǵap, rýhanııattaǵy jastardyń óse berýine tilektestik bildirdi.
– Sońǵy kezde Qazaqstan Jazýshylar Odaǵy kóptegen ister atqaryp jatyr. Biraz jastary-
myz Odaqqa múshe bolyp, qatarǵa ilesti. О́skemende rýhanııatqa azdap bolsyn, kóńil bólindi. Jalpy qazaqtyń rýhanı astanasy Semeı edi ǵoı. Men qazir qaıran qalam! Jyl saıyn artqa ketip barady. Rýhanııatymen qosa tynys-tirshiliginiń ózi tómen. Aıagózdiń deńgeıine túsip kettik. Bizge de biraz kóńil bólinse dep oılaımyn, – dep Semeıdiń súreń tartyp bara jatqanyn tilge tıek etti Tynyshtyqbek Ábdikákimov.
Al Tólegen Janǵalıev jıyndaǵy sózin óleńmen túıindedi. Arnaıy shaqyrylǵan ózge de qonaqtar oılaryn ortaǵa salyp, rýhanı sharanyń jalǵasyn tabýyna tilektestik bildirdi.
Oralhan Bókeı atyndaǵy qalalyq kitaphanada bas qosqan jazýshylar da talaı-talaı tarıhty tarqatyp, eski kúnniń estelikterimen bólisti. Jınalǵan qaýym qalamdy qarý etken jazýshylar toby bıyl seksenniń seńgirine shyqqan Kádirbek Segizbaev pen jetpiske tolǵan Álibek Asqarov synda jazýshylardyń áńgimelerin tyńdady.
Osylaısha, oramdy oı, súbeli sóz, sulý jyrmen sabaqtalǵan rýhanı shara poezııa festıvalimen jalǵasyn tapty. Munda oblystyń jas aqyndary jyrdan shashý shashyp, kórermen qoshemetine ıe boldy. Qoshemet ǵana emes, Murathan Kenjehan, Qyzyrbek Dúrginbaı, Aızat Raqysh, Hasen Zákárııa, Murat Tastaǵan, Jumaǵazy Igisin, Baýyrjan Igilik syndy qalamgerlerge Jazýshylar odaǵynyń kýáligi tabystaldy.
