«Atameken» UKP Basqarma tóraǵasynyń orynbasary Iýlııa Iаkýpbaevanyń aıtýynsha, Palata «Kazakh Tourism» UK» AQ jáne Mádenıet jáne sport mınıstrligimen birlesip, jol kartasyn qurǵan. Sonyń aıasynda turaqty týrıstik ónimderdi, eko, agrotýrızmdi damytýǵa, qonaqúılerdi ashý tájirıbesin keńeıtýge jol ashylmaq. Osylaısha, óńirdiń ekonomıkasyn órkendetýge, jumys oryndaryn qurýǵa jáne jergilikti turǵyndarǵa qosymsha tabys kózi bolatyn týrızmdi jetildirýge kóńil bólinedi.
Spıkerdiń aıtýynsha, qoldanystaǵy jáne naryqta jańadan paıda bolyp jatqan týrıstik ónimder kádesyı ónimin satyp alý, ulttyq jáne óńir úshin erekshe taǵamdardyń dámin tatý, ádemi fotosýret jasaýdy qamtýy tıis. Ol úshin UKP mamandary týrıstik ónimdi qalyptastyrý úderisine, týrıstik marshrýt qalyptasyp jatqan orynǵa shaǵyn bıznesti, sonyń ishinde óńirlik kásipkerlerdi tartý qajet dep sanaıdy. «О́ńirdegi shaǵyn bıznes ónimder tizbesin keńeıtýge jergilikti turǵyndar da qatysýy kerek. Mysaly, jylqylardy jalǵa berý, týrısterdi egistikten kókónis jınaýǵa qyzyqtyrý, qolóner boıynsha sheberlik sabaqtar ótkizý, ulttyq taǵamdar usyný syndy sharalardy uıymdastyrý kerek. Qolóner ónimderi qazaqtyń ulttyq qolónerin álemge tanytyp qana qoımaı, jekelegen óńirdiń tanylýyna jáne ilgerileýine de yqpal eteri anyq», deıdi Iý.Iаkýpbaeva.
Konferensııa aıasynda qatysýshylar ekoresýrstardy utymdy paıdalaný, jumyssyzdyq pen kedeılikpen kúres, qazirgi zamanǵy arzan týrızm jáne týrıstik ónimderdiń sapasyn jaqsartý syndy máselelerdi de talqylady.
«Atameken» UKP baspasóz qyzmeti bergen málimet boıynsha, Ulttyq kásipkerler palatasy bıyl Mádenıet jáne sport mınıstrligi jáne «Kazakh Tourism» UK» AQ-men úshjaqty kelisimshart jasasqan. Osy qujat boıynsha obektilerdi abattandyrý boıynsha naqty sharalardy anyqtaý úshin qoldanystaǵy týrıstik marshrýttardy dıagnostıkalaý; agrotýrızmdi damytý boıynsha oqytý semınarlaryn ótkizý; ekotýrızmdi damytý úshin qonaqúıler sanyn arttyrý maqsatynda trenıngter ótkizý; qolóner túrlerin saqtaý jáne ilgeriletý tásilderin pysyqtaý syndy sharalardy uıymdastyrý josparlanǵan.
