Synaqtar Izraıl Densaýlyq saqtaý mınıstrligi maquldaǵannan keıin Sýraskı medısınalyq ortalyǵynda júrgiziledi. Testileýge basqa vaksınamen egilmegen 24 erikti qatysady. Toptyń jartysy bir kapsýlany, al qalǵandary preparattyń eki dozasyn qabyldaıdy. Zertteý merzimi alty aptaǵa sozylmaq.
Oramed Pharmaceuticals kompanııasynyń bas dırektory Nadav Kıdron jańa vaksınanyń birneshe artyqshylyqtaryn atady.
«Birinshiden, ol koronavırýstyń ár túrli shtamdaryna tózimdi, óıtkeni Moderna jáne Pfizer-ge qaraǵanda ol vırýstyń úsh qurylymdyq aqýyzyna baǵyttalǵan. Ekinshiden, mundaı preparattar, ádette, janama áserlerdi kóp týdyra bermeıdi. Bolashaqta vaksınanyń bul túri ony úıde otyryp-aq qabyldaýǵa múmkindik beretin bolmaq», dep túsindirdi kompanııa dırektory.
Nadav Kıdronnyń aıtýynsha, kapsýlaly vaksınany búkil álem boıynsha tasymaldaý qıyndyq týdyrmaıdy. Sebebi, ony saqtaý úshin erekshe sharttar qajet emes, sondyqtan vaksınany standartty temperatýrada tasymaldaýǵa bolady.
Oramed Pharmaceuticals kompanııasynyń bas dırektory medısınalyq zertteý synaqtary sátti ótse, onyń basqa elderge taratý joldaryn izdeıtinin aıtty. Onyń aıtýynsha, mundaı preparattar ásirese Ońtústik Amerıka memleketterine qajet.
