Aımaqtar • 22 Shilde, 2021

Almatyda indettiń órshýine baılanysty shekteý sharalary kúsheıtiledi

142 ret kórsetildi

Almatyda indetke shaldyqqandar 4 ese kóbeıgendikten, qosymsha shekteý sharalary engizilmek. Búgin Almaty qalasy ákiminiń orynbasary Erjan Babaqumarovtyń tóraǵalyǵymen ótken koronavırýs ınfeksııasynyń taralýynyń aldyn alý jónindegi Qalalyq shtabtyń otyrysynda megapolıste qosymsha shekteý sharalaryn engizý týraly másele qaraldy, dep jazady Egemen.kz.

Aýmaqtyq Sanıtarlyq-epıdemıologııalyq baqylaý departamentiniń basshysy, Almaty qalasynyń bas memlekettik sanıtarlyq dárigeri Jandarbek Bekshın shildeniń 3 aptasynda koronavırýstyq ınfeksııanyń 12 myńnan astam jaǵdaıy tirkelgenin aıtty, bul maýsym aıynyń osy kezeńindegi kórsetkishterden 4 ese joǵary. Demek, qoǵamda COVID-19-dyń taralý qarqyny joǵary, sondyqtan qatań shekteý sharalary engizilýi tıis.

Búginde ınfeksııa juqtyratyn negizgi oryndar: bazarlar, qoǵamdyq kólikter, meıramhanalar, kafeler, barlar, adamdar kóp jınalatyn saıabaqtar men jaıaý júrginshiler kósheleri bolyp tur.

Epıdemıologtardyń aıtýynsha, bazarlarda dert juqtyrý 10%-dan 15,9%-ǵa deıin, saýda nysandarynda 31%-dan 39,7%-ǵa deıin, demalys saıabaqtarynda jáne jaıaý júrginshiler kóshelerinde ­– 1,2%-dan 5%-ǵa deıin ósken. Sondyqtan Mekemearalyq komıssııanyń usynysy boıynsha koronavırýs ınfeksııasynyń taralýyn boldyrmaý úshin shekteý sharalaryn kúsheıtý josparlanyp otyr. Atap aıtqanda, nysandardyń jumystaryna barynsha qatań shekteýler  qoıý josparlandy. Qalanyń bas memlekettik sanıtarlyq dárigeriniń qaýlysyna jaqyn arada tıisti tolyqtyrýlar men ózgerister engiziledi ári jarııalanatyn bolady.

Sonymen qatar, karantındik sharalardyń saqtalýyn baqylaý jónindegi monıtorıngtik toptardyń jumysy týraly másele qaraldy. Búginde Almatyda 40 monıtorıng toby jumys isteıdi. Shilde aıynyń basynan bastap 278 kóshpeli is-sharalar ótkizildi, 2733 obekti qamtyldy, 245 buzýshylyq anyqtaldy. Zańdy jáne jeke tulǵalarǵa 173 hattama jasaldy. Ákimniń orynbasary Erjan Babaqumarov Ashyq-ta jumys isteıtin nysandar arasynda tártip buzýshylardy anyqtaý jumystaryn kúsheıtýdi jáne qoǵamdyq oryndarǵa «qyzyl mártebemen» barǵandardy jaýapkershilikke tartýdy tapsyrdy. Budan ózge, mobıldi monıtorıngtik toptardyń jumysyn InfoKazakhstan elektrondy platformasyna tirkeý arqyly jańa jumys formatyna kóshirý týraly tapsyrmalar berildi.

Aıta keterligi, qoldanystaǵy shekteýlerdi kúsheıtý ınfeksııanyń jappaı taraýynyń aldyn alýǵa baǵyttalǵan, bul densaýlyq saqtaý júıesine resýrstardy tıimdi bólýge jáne sapaly medısınalyq qyzmet kórsetýge, tósek oryndar men medısına personalynyń tapshylyǵyn boldyrmaýǵa múmkindik beredi.

Infeksııa otbasylyq baılanystarda 17,7%-dan 19,4%-ǵa deıin ósken. Sondyqtan qalalyqtarǵa koronavırýs ınfeksııasyna qarsy vaksına alý qajet, bul turǵyndardyń densaýlyǵyn qorǵaıdy jáne jaqyn adamdardy dertten saqtaıdy.

«Qalada epıdemııalyq ahýal kúrt ýshyqty. COVID-19-dyń «Delta» shtamyn jalǵasyp jatyr. Qalada densaýlyqty saqtaý men epıdemııanyń aldyn alýdyń jalǵyz joly – tek vaksınalaný. Sondaı-aq bárimiz betperde rejımin jáne áleýmettik araqashyqtyqty saqtaýǵa tıispiz», ­­dedi Erjan Babaqumarov. Ol ekpe saldyrý, betperde rejımi men áleýmettik araqashyqtyqty qatań saqtaý epıdemııanyń órshýi kezinde óte mańyzdy ekenin atap ótti.

Qalalyqtardyń densaýlyǵyn qorǵaýdy qamtamasyz etý úshin ujymdyq ımmýnıtetti qalyptastyrý jumystary jalǵasýda. Búginde Almatyda 665 myń adam birinshi komponentpen vaksınalandy. Qalada medısınalyq uıymdarda, mektepterde, mádenı jáne sporttyq mekemelerde, bazarlarda jáne qalanyń SOSO 212 vaksına salý pýnktteri jumys jasap otyr.

Sońǵy jańalyqtar

Uqsas jańalyqtar