Ujym demekshi, búginde el ishinde mekeme qyzmetkerleri birlesip ekpe egýdi úrdiske aınaldyrǵan. Ásirese, Almaty oblysynda. Bul oraıda oblystyń sanıtarlyq-epıdemıologııalyq baqylaý departamentiniń mamandary kúndelikti monıtorıng júrgizýde. Aýdan, qalalardaǵy memlekettik jáne jekemenshik mekemelerdiń qyzmetkerleri ekpe saldyrýǵa ujym bolyp barýda.
Taldyqorǵan qalasyndaǵy Ilııas Jansúgirov atyndaǵy Jetisý ýnıversıtetiniń ustazdary men stýdentteri uıymdasqan túrde ekpe alýda. Búgingi tańda oqý ornynyń 674 qyzmetkeriniń 304-i vaksınanyń eki komponentin de aldy. Al 4 049 stýdenttiń 1 261-i ekpe saldyrdy.
– Ujymdyq ımmýnıtet qalyptastyrmaı syrqattanýdyń aldyn alý múmkin emes. Sondyqtan ýnıversıtettiń oqytýshylar quramy men stýdentteri ekpe alýda. Jańa oqý jylyna daıyndyq búginnen bastalǵan. Barlyq sanıtarlyq talaptardy saqtaý nazarǵa alynǵan. Ýnıversıtet Ashyq jobasyna qosyldy. Kelýshiler mekemeniń syrtqy qashasynan tekserý tobynyń tekserýinen ótedi. Ýnıversıtette vaksına saldyrýdyń tıimdiligi barysynda brıfıng uıymdastyrylýda. Ekpe saldyrǵandardy marapattaý maqsatynda stýdentter úıinde turý aqysyn azaıtamyz. Sondaı-aq shet tilin tegin oqytý kýrstaryn ashamyz. Aǵylshyn tilinen dáris júrgizilip, sertıfıkat beriledi, – deıdi ýnıversıtet rektory Qýat Baımyrzaev.
Taldyqorǵandaǵy №1 emhananyń sanıtarlyq-epıdemıolog dárigeri Aıgúl Musaǵulovanyń aıtýynsha, Jetisý ýnıversıteti sııaqty ujymmen ekpe alyp jatqandardyń qatary ósken.
Atalmysh emdeý mekemesiniń vaksına salý brıgadasy mekemelerge ózderi barýda. Ekpeni ujymmen saldyramyz dep habarlassa, dárigerler jedel keledi.
Sonyń nátıjesinde qaladaǵy bilim berý mekemeleri, quqyq qorǵaý oryndary, áskerı bólimsheler koronavırýsqa qarsy ekpeni kezekpen alýda. Bul emhana kúnine 500-600 adamǵa qyzmet kórsetýde. Al Taldyqorǵan qalasy boıynsha táýligine 900-ge tarta adam vaksına alyp, jaman aýrýdan saqtanýda.
Aıtpaqshy, osy rette aıta ketkenimiz jón shyǵar. Totydaı túrlengen Taldyqorǵanda DiVera medısınalyq ortalyǵy aıasynda ortalyqtandyrylǵan medısınalyq zerthana ashyldy. Zamanaýı ǵımarattyń lentasyn oblys ákiminiń orynbasary Arslan Dándibaev, OLYMP MEDICAL GROUP JShS bas dırektory Erjan Súleımenov, Densaýlyq saqtaý mınıstrliginiń bas onkology, akademık Dılıara Qaıdarova, oblystyq densaýlyq saqtaý basqarmasynyń basshysy О́mirzaq Nııazbekov qıyp, aqjoltaı tilegin joldady.
Densaýlyq saqtaý sektorynda halyqqa bastapqy medısınalyq-sanıtarlyq kómekti damyta otyryp, densaýlyq saqtaý salasynyń qoljetimdiligi men sapasyn arttyrýǵa mán berilip keledi. Medısınanyń joǵary tehnologııalyq júıesin damytý arqyly halyqtyń densaýlyq jaǵdaıyn jaqsartý qajettiligi «Qazaqstan – 2050» Strategııasynda atap ótildi.
Oblystyq densaýlyq saqtaý basqarmasy, «KDL OLIMP» JShS kompanııasy men OLYMP MEDICAL GROUP JShS arasynda memlekettik jáne jekemenshik áriptestik negizinde zerthana ashý qolǵa alynǵan edi. Shartqa sáıkes bıomaterıaldardy zertteýdiń keń spektri usynylyp, qalalyq emhanalardyń qajettilikterin óteý úshin jańa nysan salynyp, jaraqtandyryldy.
DiVera medısınalyq ortalyǵy – Fujifilm Amulet Innovality eń zamanaýı apparatymen jabdyqtalǵan jáne qazirgi ýaqytta bul oblys pen Taldyqorǵan qalasyndaǵy sút bezi qaterli isiginiń keshendi dıagnostıkasyn júrgizetin jalǵyz ortalyq.
Jobanyń maqsaty – joǵary sapaly zerthanalyq qyzmet kórsetý, syrqattarǵa naqty dıagnoz qoıý arqyly halyqqa medısınalyq qyzmet kórsetýdi jaqsartý, halyqqa sút bezi syrqaty dıagnostıkasy boıynsha joǵary sapaly qyzmetter kórsetý, sút beziniń rentgen sýretterin óńdeýdiń sandyq ádisterin engizip, rentgen sýretterin óńdep, oqý jáne saqtaýdy qamtamasyz etý; sondaı-aq halyqqa sút bezi skrınıngi boıynsha qyzmet kórsetýdi jaqsartý, sút bezi obyrynyń aldyn alý arqyly áıelder arasyndaǵy ólim-jitimdi tómendetýge yqpal etý. Qazaqstanda sút bezi obyry áıelderdiń onkologııalyq aýrýshańdyǵy qurylymynda birinshi orynda jáne halyqtyń onkologııalyq aýrýlarynyń jalpy qurylymynda ekinshi orynda tur.
Mekemeni ashýdaǵy taǵy bir maqsat – pasıentterdi tekserý, keńes berý jáne emdeý prosesterin ortalyqtandyrý. Atalmysh zerthana jylyna kem degende 1 mln 530 myń zertteý júrgizedi. Mekemede gınekolog, pedıatr, terapevt, taǵy basqa mamandar qabyldaý ótkizedi.
Birligi birizdi Jetisý jurty indetten qutylýdyń joly tutastyqta ekenin uqqandaı. Ulttyń densaýlyǵyn túzeıtin jańa ǵımarattar el ıgiligine jarap, turǵyndar baıyrǵy alańsyz kúnderine oralaryna senimdimiz.
