Táýelsizdiktiń 30 jyldyǵyn merekeleýge baılanysty ótken onlaın brıfıngte Nur-Sultan qalasy ishki saıasat basqarmasynyń basshysy Dáýren Babamuratov búginge deıin halyqaralyq, respýblıkalyq, qalalyq jáne aýdandyq deńgeıde 300-den astam túrli is-shara uıymdastyrylǵanyn atap ótti. Otyz jyldyqty merekeleýge qatysty ártúrli formattaǵy taǵy 800-den astam shara ótkizilmek. Onyń 700-den astamy qalalyq jáne aýdandyq deńgeıde bolsa, 80-i halyqaralyq jáne respýblıkalyq deńgeıde uıymdastyrylmaq.
«Jastar arasynda sportty nasıhattaý, óskeleń urpaqty salaýatty ómir saltyna tárbıeleý maqsatynda qala ákimdigi Táýelsizdiktiń 30 jyldyǵyn merekeleý aıasynda birqatar respýblıkalyq jáne qalalyq sporttyq is-sharalar ótkizdi. Sondaı-aq qala turǵyndaryn buqaralyq sportqa tartý úshin sport nysandary da ashyldy. Atap aıtqanda, Boks ortalyǵy, Kórkem gımnastıka ortalyǵy jáne Jekpe-jek zaly qazir jurtshylyqtyń jıi baratyn mekenine aınaldy. Qalanyń shetki eldi mekenderi de nazardan tys qalǵan joq. О́ndiris, Kóktal syndy alaptarda dene shynyqtyrý-saýyqtyrý keshenderi, jaýyngerlik óner ortalyqtary ashyldy», deıdi D.Babamuratov.
El Táýelsizdiginiń 30 jyldyǵyna oraı ótkiziletin sharalarǵa elordanyń barlyq mádenıet mekemesi jumylmaq. Mereke barysynda oflaın jáne onlaın rejimde arnaıy taqyryptaǵy konserttik baǵdarlamalar, spektaklder, qoıylymdar, shyǵarmashylyq keshter, kórmeler, ekskýrsııalar ótkiziledi.
Búginge deıin qalada Táýelsizdiktiń 30 jyldyǵyna oraı 30 qaıyrymdy is ótkiziletini habarlanǵan edi. Jalpy, mundaı sharalar jyl saıyn qolǵa alynady. Biraq otyz jyldyqtyń aýrasy erekshe. Osyǵan oraı uıymdastyrylatyn merekelik sharalardyń aýqymy da bólek. Meıramda merekelik kóńil kúıdi kóterý maqsatynda konserttik baǵdarlamalar ǵana emes, eldiń esinde qalarlyq qaıyrymdylyq aksııalary, qamkóńil jandarǵa qolushyn berý, áleýmettik kómek jasaý, asar ótkizý sekildi sharalar da qamtylmaq.
Aıtpaqshy, daryndy jastar da nazardan tys qalmaıdy. Olardyń talantyn ushtaý, qoldaý maqsatynda «Táýelsizdik urpaqtary» atty 30 grant berilgeli otyr. Elorda Info saıtynyń habarlaýynsha, jastar «Ǵylym», «Mádenıet», «Bıznes», «Aqparattyq tehnologııalar», «Medıa» baǵyttary boıynsha óz jobalary men jańa ıdeıalaryn usynyp, baq synaı alady. «Táýelsizdik urpaqtary» granttary daryndy ári qabiletti jastardy memlekettik qoldaý maqsatynda jyl saıyn beriledi. Úmitkerlerdiń konkýrstyq ótinimderin qabyldaý 20 qyrkúıekke deıin jalǵasady. Bul – talantty jastarǵa úlken múmkindik», deıdi Jastar jáne otbasy isteri komıtetiniń tóraǵasy Shahmardan Baımanov Ortalyq kommýnıkasııalar qyzmetinde ótken brıfıngte.
Sonymen Táýelsizdiktiń 30 jyldyǵyna arnalǵan sharalar kóp. Álbette, pandemııaǵa baılanysty josparǵa ózgerister engizilip, formaty túzetilýi múmkin deıdi uıymdastyrýshylar. Degenmen de basty sharalar ótkiziledi. «Jyl sońyna deıin qalada el egemendiginiń 30 jyldyǵyna arnalǵan júzdegen sporttyq, mádenı, ǵylymı-tanymdyq, qaıyrymdylyq is-sharasyn ótkizý josparda bar. Bul jaǵdaıda sanıtarlyq normalar men shekteý sharalary qatań saqtalady», deıdi D.Babamuratov.
Basqarma basshysy, sondaı-aq maýsym-shilde aılarynda Nur-Sultanda Memlekettik rámizder kúni, Medısına qyzmetkerleri kúni, Qazaqstan polısııasy kúni jáne Elorda kúni sııaqty merekelerge arnalǵan 200-den astam túrli is-shara ótkenine de toqtaldy. «Bıyl Elorda kúnin merekeleý áleýmettik jobalarǵa arnaldy jáne tek áleýmettik sıpatta boldy. Osylaısha, halyqtyń áleýmettik osal toptary arasynda kezekte turǵandarǵa páter kilti tapsyryldy, qurylysy uzaqqa sozylǵan 20 úı aıaqtaldy, О́ndiris jáne Kóktal eldi mekenderinde iri dene shynyqtyrý-saýyqtyrý keshenderi paıdalanýǵa berildi. Sonymen qatar kórý qabileti buzylǵan balalarǵa arnalǵan mamandandyrylǵan balabaqsha ashyldy, 50-den astam aýlanyń, 10-ǵa jýyq qoǵamdyq keńistiktiń qurylysy aıaqtaldy», dedi ol.
Budan bólek, elordada qazaq halqynyń belgili tulǵalary — Dına Nurpeıisovaǵa, Qanysh Sátpaevqa, Álıhan Bókeıhanǵa, Ahmet Baıtursynulyna jáne Mirjaqyp Dýlatulyna eskertkishter ornatyldy. Sondaı-aq Táýelsizdik mereıtoıyna oraı Nur-Sultanda «Qutqarýshylar saıabaǵy» ashyldy.
