Basynan bastap baıandasaq, el-jurttyń koronavırýs pandemııasynyń qaýpinen shaılyǵyp, keıbiri týystarynan aıyrylyp jatqan byltyrǵy qazanda emhananyń esepshotynan 70 mln teńgeniń urlanǵany belgili boldy. Sol kezde oblystyq densaýlyq saqtaý basqarmasy basshysynyń mindetin atqarýshy bolyp taǵaıyndalǵan Ashan Baıdýálıev emhananyń esepshotyndaǵy 70 mln teńgeniń elektrondy túrde urlanǵanyn aıtqan edi.
«Baqsaq baqa eken» demekshi, 2019 jylǵy 25 jeltoqsanda D.T. degen azamat kásipkerlik qyzmetpen aınalysý úshin Almaty oblysynyń Taldyqorǵan qalasynda «Lab service plus 1» jaýapkershiligi shekteýli seriktestigin tirketipti. Sodan keıin A.A. esimdi azamatpen jáne sotqa deıingi tergep-tekserý kezinde anyqtalmaǵan belgisiz tulǵalarmen aldyn ala sóz baılasady. Sóıtip byltyrǵy 13 shildede Almaty qalasyndaǵy bankten shot ashyp, bankomattyq kartochka men onlaın bankıng kiltin alǵan.
Sol jylǵy 3 tamyzda belgisiz tulǵalar saǵat 16:00-17:00 aralyǵynda Atyraýdaǵy №1 qalalyq emhananyń qarjy-sharýashylyq qyzmetiniń aqparatyna zańsyz qol jetkizedi. Emhananyń qarjylyq esep-qısabyn aýdaryp-tóńkerip qana qoımaı, býhgalterııanyń qashyqtyqtan aqparattyq qol jetkizý júıesine ruqsatsyz kiredi. Osylaısha, emhana úshin jalǵan tólemder jasap, №1 Atyraý qalalyq emhanasynyń esepshotynan «Lab service plus 1» JShS-niń esepshotyna jáne D.T.-nyń jeke shotyna koronavırýs indetine qarsy kúreske bólingen qarajat esebinen 70 mln teńgeni aýdarǵan. Al A.A. óńi túgil, úsh uıyqtasa túsine kirmegen qomaqty qarjyny qolma-qol sheship alyp, emhanaǵa múliktik zor zııan keltirgen.
Jaqynda osy qylmystyq is qaralyp, Atyraý qalasynyń №2 sotynyń úkimimen D.T. men A.A. Qylmystyq kodekstiń 188-babynyń 4-bóligi, 3) tarmaǵymen (Urlyq, ıaǵnı aldyn ala adamdar tobymen sóz baılasý arqyly, asa iri mólsherde, aqparattyq júıege zańsyz kirý jolymen, bótenniń múlkin jasyryn jymqyrý) kináli dep tanyldy. Alaıda sot jazany jeńildetetin mán-jaılar retinde A.A.-nyń buryn sottalmaǵanyn, asyraýynda tórt jas balasynyń baryn, aıybyn moıyndap, shyn nıetpen ókingenin, qylmystyq quqyq buzýshylyqty áshkereleýge belsendi túrde yqpal etip, qylmyspen keltirilgen múliktik zııandy ishinara ótegenin eskerdi. Sondaı-aq D.T.-nyń da buryn sottalmaǵany, asyraýynda jas balasynyń bary qaperge alyndy.
Sot qylmystyq quqyq buzýshylyqtyń sıpaty men qoǵamǵa qaýiptilik dárejesin eskerip, Qylmystyq kodekstiń 55-babynyń 2-bóligimen D.T-ǵa 6 jyl 6 aı, al A.A-ǵa 5 jyl merzimge bas bostandyǵynan aıyrý jazasyn taǵaıyndady.
Atyraý oblysy
