«Al jyl basynan beri oblys joldarynda kólik quraldaryn masań kúıde basqarǵan 117 júrgizýshi anyqtaldy», deıdi oblystyq polısııa departamenti bastyǵynyń birinshi orynbasary polısııa polkovnıgi Qanat Aıtbaev. Al «Qaýipsiz jol» profılaktıkalyq is-sharasynyń maqsaty – jol-kólik oqıǵalarynyń qaýpin tómendetý. Jyl basynan beri oblysta 80 jol-kólik oqıǵasy tirkelgen. Sonyń saldarynan 12 adam qaza taýyp, 99 kisi jaraqat alǵan. 11 jol-kólik oqıǵasyna mas júrgizýshiler kináli bolyp, olardyń kesirinen 2 adam kóz jumyp, 15 adam jaraqattanǵan.
Osy jedel-profılaktıkalyq is-shara aıaqtalǵan kúnniń erteńine Petropavl qalasynyń patrýldik polısııa batalonynyń qyzmetkerleri Nursultan Nazarbaev kóshesinde jol erejesin buzǵan «Audi» avtokóligimen kele jatqan 23 jastaǵy júrgizýshini toqtatqan. Jigitten alkogol ıisi ańqyp turǵan. Medısınalyq kýálandyrý onyń orta deńgeıdegi mas ekenin kórsetken. Sol kúni sot sheshimimen tártip buzýshyǵa 15 táýlikke ákimshilik qamaýǵa alý jazasy taǵaıyndaldy. Budan bólek ol aldaǵy 7 jylda kólik júrgizý quqyǵynan aıyryldy.
Alaıda kólik júrgizý quqyǵynan aıyrylǵan adamdardyń zańsyz rýlge otyrý faktileri de azaımaı otyr. Máselen, 11 shildede Petropavldaǵy Shýhov kóshesinde patrýldik polısııa batalonynyń qyzmetkerleri «VAZ-2114» kóligimen kele jatqan masań kúıdegi 33 jastaǵy qala turǵynyn toqtatqan. Derekter bazasyna qaraǵanda, ol júrgizýshilik kýáliginen aıyrylǵan azamat eken, al qazir qolyndaǵy qujaty basqa adamdiki bolyp shyqqan. Bul zań buzýshylyqqa baılanysty jalǵan qujat jasaý qylmysy boıynsha da is qozǵaldy. Atalǵan fakti Qylmystyq kodekstiń 385-baby – «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» boıynsha Sotqa deıingi tergep-tekserýlerdiń biryńǵaı tizilimine engizildi. Sonymen qatar masań kúıde kólik basqarǵany úshin sot sheshimimen quqyq buzýshyǵa 20 táýlikke ákimshilik qamaqqa alý túrindegi jaza taǵaıyndaldy. Mingen kóligi arnaıy turaqqa qoıyldy.
«Qaýipsiz jol» jedel-profılaktıkalyq is-sharasynyń 10 kúninde jol qozǵalysy tártibin buzýdyń 4,5 myńnan astam deregi anyqtalǵan. Jol qozǵalysy qaýipsizdigine qaýip tóndiretin óreskel buzýshylyqtardyń arasynda manevr jasaý erejeleriniń 131 buzýshylyǵy, baǵdarshamnyń tyıym salynǵan belgisine ótip ketýdiń 72 faktisi jáne dál sonshama apattyq jaǵdaı týdyrý faktisi, sondaı-aq jyldamdyqty asyrýdyń 389 faktisi anyqtalǵan.
Soltústik Qazaqstan oblysy
