«Búgin Japonııa astanasy Tokıo qalasynda XXXII jazǵy Olımpıada oıyndarynyń alaýy tutandy. Tórt jylda bir keletin dúbirli doda búkil álemniń nazaryn aýdaratyn aıtýly báseke ekeni anyq. Pandemııa saldarynan bıylǵy alamannyń bir jylǵa keshiktirilýi de onyń básin arttyra túsetini sózsiz.
Olımpıada oıyndaryna qazaqstandyq sportshylar da attandy. Olar sporttyń 27 túrinen baq synaıdy. Tokıoǵa attanar aldynda Memleket basshysy Qazaqstan quramasyn qabyldap, atletterimizge sáttilik tilegen edi. Sol jıynda Prezıdentimiz jahandyq saıystyń Qazaqstan Táýelsizdiginiń 30 jyldyǵymen qatar kelýine mán berip, osyndaı mereıli kezeńde Olımpıada tuǵyryna kóterilý tutas ulttyń abyroıyn asqaqtatar aıryqsha sát ekenin aıtty.
Sondyqtan jalaýy jelbiregen jazǵy Oıyndarda synǵa túsetin barlyq sportshylarymyzǵa sáttilik tileımiz! Eldiń namysy men senimin arqalaǵan atletterimizge kúsh-qýat bersin! Bir-birimizden súıinshi surar jeńisti kúnder kóp bolsyn!», dep jazdy ol.
