FOTO: Jeńis Ysqabaı, Qazaqstan UOK
«Qýanyshty sezimdemin. Biraq men Olımpıadaǵa altyn úshin kelip edim. Buıyrǵany osy boldy. Men ol úshin ókinbeımin. Sebebi, jartylaı fınaldaǵy beldesý fınalǵa bergisiz boldy. Takato óte myqty balýan. Bir-birimizdi bilemiz. О́zderińiz kórgendeı, shabýyl jasaımyn dep, «qaqpanǵa» túsip qaldym. Pandemııaǵa baılanysty tolyq jattyǵý jasaı almadyq. Álem chempıonatyna barmaǵanym durys bolǵan sııaqty. Sebebi, doda aldynda salmaq qýyp, sharshap qalasyn.
Qazir maǵan demalys kerek. Emdelip, qatarǵa qosylyp jatsam Parıj Olımpıadasy jaıly oılanýǵa bolady. Ázirge durystap demalýym kerek. Qalǵan jigitterge sáttilik tileımin. Men baǵyndyrmaǵan bıik belesterdi baǵyndyrsyn deımin. Olımpıada uıymdastyrý komıtetiniń erejesi boıynsha kúresip bolǵannan keıin men 48 saǵatta Japonııadan shyǵyp ketýim kerek. О́kinishke qaraı jigitterge qoldaý kórsete almaımyn.
Maǵan qoldaý kórsetken bapkerlerim, aǵalaryma myń alǵys. Otan otbasydan bastalady deıdi. Meniń janashyrym otbasyma da myń alǵys aıtamyn. Olımpıadanyń alǵashqy kúni jaman bolmady dep oılaımyn.Olımpıadada Qazaqstannyń Kók týy jelbirep, Ánuranymyz shyrqala bersin degim keledi», dep Olımpıadada alǵan áserlerimen bólisti Eldos Smetov.
