Oblystyq saılaý komıssııasynyń múshesi Álııa Dýanbaevanyń aıtýynsha, saılaýǵa barlyǵy 147 úmitker túsken. Aımaqtaǵy barlyq saılaý ýchaskesinde Ortalyq saılaý komıssııasynyń nusqaýlyǵyna saı daýys berý kabınetteri jasaqtalyp, kandıdattar týraly málimetter, komıssııa quramy, sot, prokýratýra organdarynyń telefon nómirleri kórsetilgen qajetti aqparattyq stendter, daýys berý kabınetine engen soń saılaýshynyń ózin-ózi qalaı ustaýy kerektigine deıin táptishtep túsindirilgen erejeler ilingen. Saılaý ýchaskelerinde koronavırýsqa qarsy sanıtarlyq saqtyq sharalarynyń jan-jaqty qarastyrylǵanyn da aıta ketken jón.
Biz tarıhı mańyzy erekshe saıası naýqannyń barysyn kózben kórip, saılaýshylarmen tildesip kórý maqsatynda tańǵy saǵat jetiden kete oblys ortalyǵyna jaqyn ornalasqan Qostanaı aýdanyna qarasty Sadchıkov aýyldyq okrýgine bardyq. Munda 1 640 saılaýshy turady. Aýyldyq okrýg ákimi saılaýyna úsh kandıdat túsip otyr. Úmitkerlerdiń ekeýi ózin ózi usynǵan. Al bireýi – «Aq jol» demokratııalyq partııasynyń ókili.
Saılaý ýchaskesi aýyldyq mektepke ornalasqan eken. Esik aldynda qańtarylǵan kólikter, kiresili-shyǵasyly saılaýshylar kóp. Qujattarymyzdy kórsetip, ishke enip, saılaý ýchaskesiniń tóraǵasy Aleksandr Rıabıchevke jolyqtyq.
– Tańǵy saǵat altydan bastap jumysqa kiristik. Seıfti ashyp, komıssııa múshelerine saılaý bıýlletenderin úlestirip berdik. Olar bıýlletenderdi taǵy bir sanap aldy. Baıqaýshylar men senimdi tulǵalar tirkelip bolǵan soń, 6:30-da saılaýshy bıýlleten salatyn jáshikterge mór bastyq. Saǵat týra jetini soqqanda, elimizdiń Gımni oryndalyp, saılaý ýchaskesin ashtyq. Sanıtarlyq normaǵa sáıkes bul saılaýǵa 4 baıqaýshy qatysyp otyr. Aýyl turǵyndary saılaýǵa belsendi qatysyp jatyr. Qazir saǵat 7:40-ty kórsetip tur, osy ýaqyt aralyǵynda 50-den astam saılaýshy daýys berip úlgerdi, – dedi Aleksandr Iаkovlevıch.
Saılaý barysynda qandaı da bir zańǵa qaıshy dúnıelerdiń, kemshilikterdiń bolmaǵanyn baıqaýshylar da aıtyp otyr.
– Saılaý ýchaskesi belgilengen ýaqytta ashyldy. Kireberiste dárigerler kezekshilik etip tur, ol ár daýys berýshiniń dene qyzýyn ólshep, tekserip ótkizedi. Saılaýshylar tarapynan da, saılaýdy uıymdastyrýshylar tarapynan da eshbir zań buzý áreketi bolǵan joq, – dedi «Partııalyq emes baqylaý ortalyǵynyń» ókili Ańsaǵan Júrsinov.
– Saılaý ýchaskesi ashylǵaly osynda júrmin. Oblystyń bas sanıtarlyq dárigeri shyǵarǵan qaýlynyń talap-erejeleri tolyq saqtalýda. Saılaýshylar kireberiste qoldaryn antıseptıkpen tazalap kirýde, sondaı-aq barlyq daýys berýshilerge jeke qorǵanysh zattary – betperde, medısınalyq qolǵap, tipti qalamǵa deıin berilip jatyr. Odan keıin jeke kýáligin kórsetken daýys berýshige bıýlleten berilip, saılaýshylar ózi tańdaǵan kandıdatqa daýystaryn berip jatyr. Eshbir zań buzýshylyq oryn alǵan joq, saılaý el zańnamasyna sáıkes ótip jatyr, – dedi saılaý barysyn baqylap otyrǵan «Aq jol» partııasynyń ókili Galına Dýdına.
Sadchıkov aýylynyń turǵyny Altyn Erjanova saılaý barysyn úmitkerlerdiń biriniń senimdi adamy retinde baqylap otyr eken.
– Saılaý zań talaptaryna saı ótip jatyr. Turǵyndar kóp kelip jatyr. Bul naýqannyń basty maqsaty bárine túsinikti. Búgin aýyl halqy ózi jaqsy biletin, isker, tájirıbeli azamatty tańdaýǵa tıis dep oılaımyn. Bolashaq ákimimiz aýylymyzdyń búgini men erteńin teń oılap, barlyq kúsh-jigerin salyp, osy eldiń kórkeıýine, turǵyndardyń ómir sapasynyń jaqsarýyna, jumys oryndarynyń kóptep ashylýyna bar kúsh-jigerin jumsaıdy degen senimdemin, – dedi baıqaýshy.
Saılaý ýchaskesine erte kelgendikten, aýyldyq okrýg boıynsha eń birinshi daýys bergen turǵynmen tildesýdiń sáti tústi. Úsh balanyń anasy Svetlana Cherepanova ózi tańdaý jasaǵan úmitkerge senetinin jetkizdi.
– Men búgin saılaýǵa eń birinshi bolyp keldim. Dál 7:00-de osy jerde bolyp, óz tańdaýymdy jasadym. Tóraǵanyń qolynan syılyq aldym. Jalpy, bizdiń aýylymyz úshin bul saılaýdyń mańyzy zor. О́ıtkeni buǵan deıin aýyl ákimin aýdandyq máslıhat saılaıtyn. Endi halyq ózi saılaǵan soń, osy aýyldy jaqsy biletin, janashyr, jergilikti azamat ákim bolatyn shyǵar degen úmittemiz. Mysaly, meniń úsh balam bar, biraq aýylda mektep janyndaǵy balalar ortalyǵy jumys istep turǵanymen, áli kúnge deıin jeke balabaqsha joq. Bolashaq ákim osy máseleni sheshýge kúsh salady degen úmittemin, – dedi S.Cherepanova.
Qostanaı oblysy
