«О́tken aptada el aýmaǵynda 3226 qylmys jasaldy, onyń 2225-i táýlik ishinde ashyldy. Polısııa qyzmetkerleri «izin sýytpaı» 12 kisi óltirýdi, 8 ólimge ákep soqqan densaýlyqqa qasaqana aýyr zııan keltirýdi, 2 qaraqshylyq, 44 tonaý jáne 466 bóten múlikti urlaý qylmysyn ashty», dep málimdedi Sh. Berikqyzy IIM-de onlaın ótken baspasóz máslıhatynda.
Baspasóz máslıhaty barysynda eldegi turmystyq zorlyq-zombylyq máselesi nazarǵa alyndy. Mınıstrlik ókiliniń aıtýynsha, atalǵan problemaǵa qatysty zańnama 2009 jyly qabyldanyp, sodan beri oǵan 12 márte tolyqtyrý men ózgertýler engizildi.
QR IIM Ákimshilik polısııa komıteti tóraǵasynyń orynbasary Alekseı Mılıýk elimizde turmystyq zorlyq-zombylyqqa qatysty jaýapkershiliktiń kúsheıtiletinin aıtty.
«Qoldanystaǵy zańnamaǵa sáıkes, quqyq qorǵaý organdary ákimshilik isti zardap shegýshiniń ótinishinsiz de júrgize alady. Degenmen, otbasylyq zorlyq-zombylyq kórgen áıel, ıaǵnı zardap shegýshi, kóp jaǵdaıda kúıeýine psıhologııalyq, qarjylyq jaǵynan táýeldi bolǵandyqtan máseleni ýshyqtyrǵysy kelmeı, tatýlasýǵa kelisimin beredi. О́tken jyly bizge el boıynsha turmystyq zorlyq-zombylyq qurbanymyn dep jazylǵan 190 myń ótinish kelip tústi. Sonyń tórtten biri ǵana sotqa deıingi tergeýge jiberildi. Jalpy, zorlyq-zombylyqqa qatysty ákimshilik is júrgizýdiń 60 paıyzy eki jaqtyń tatýlasýyna baılanysty toqtaıdy. Osy oraıda biz turmystyq zorlyq-zombylyq oryn alǵan jaǵdaıda eki jaqtyń tatýlasý prosesin qaıta qaraýdy qolǵa alyp jatyrmyz. Iаǵnı, aldaǵy ýaqytta kúıeýi tarapynan áıeline qol kóterý qaıtalanǵan jaǵdaıda tatýlasýǵa ruqsat bermeý josparda bar», dep túsindirdi Alekseı Mılıýk.
