TOKYO2020 • 28 Shilde, 2021

«Qazaqtyń salmaǵy» kimge buıyrady?

91 ret kórsetildi

Olımpıadanyń tórtinshi jarys kúni de artta qaldy. Úsh kún boıy kúnine bir-bir qoladan alyp, «qolabek» atanǵan qazaqstandyqtardyń arasynan «altynbekti» alańdap kútýdemiz. Altynnan dámelenetin jónimiz de bar. Álemdik reıtıngte úzdik ondyqta turǵan taekvondoshy Rýslan Japarov pen Azııa oıyndarynyń kúmis júldegeri Jansel Denız jáne óziniń ekinshi Olımpıadasynda baq synaýǵa kelgen dzıýdoshy Dıdar Hamza sekildi sportshylar altynǵa bastar joldy biledi dep sendik. Sóıtsek...

...Sportshylarymyz bul kúni jeńiske bastar joldy tappaı, barlyǵy shetinen jeńiliske ushyrady. Tórtinshi kúnniń jarysyn 67 kılodan joǵary salmaq dárejesinde synǵa túsken taekvondoshy Jansel Denız bastap shyqty. Onyń alǵashqy qadamy sátti bolǵan-dy. О́zimen deń­geıles ózbek sportshysy Svet­lana Osıpovamen jekpe-jek ótkizgen Jansel 10:9 esebi­men jeńiske jetti. Alaıda Jan­seldiń shamasy kelesi kezde­sýinde úsh dúrkin álem chempıony Ulybrıtanııa ókili Bıanka Ýaldenge jetpedi. Esep ‒ 7:17.

Al erler arasynda 80 kılodan joǵary salmaqta jarysqa shyqqan Rýslan Japarov ta dodany sátti bastap edi. Ol alǵashqy aınalymda Germanııa sportshysy, 2017 jylǵy álem chempıony Aleksandr Bahmandy 11:7 ese­bimen utyp, medal alatyn favorıtter qataryna kirdi. Kóp uzamaı ekinshi kezdesýinde Ońtústik Koreıa ókili, álemdik reıtıngte ekinshi turǵan Kıo Don Innan 2:10 esebimen oısyraı jeńildi.

Dzıýdodan 81 kıloda saıys­qa túsken Dıdar Hamza Olım­pıadany ekinshi aınalymnan bas­taǵan. Alaıda júldeden úmitti úshinshi sportshymyz da bul kúni sylbyr kúresti. Dıdar­dyń qarsylasy álem chempıony Saıd Mollaı edi. Azýly moń­ǵo­lııalyq dzıýdoshy urymtal sát­te jerlesimizdi «ıpponǵa» taza túsirdi.

Ásheıinde quralaıdy kózge atqan mergenderdiń urpaǵymyz dep maqtanǵanda aldymyzǵa jan salmaımyz ǵoı. Al nysanany kózdeýge kelgende barlyǵy basqasha bolady. Sadaq atýdan qazaqstandyq Denıs Gankın Tokıo Olımpıadasynda oıda­ǵydaı óner kórsete almady. De­nıs birinshi kezeńde Mysyr sport­shysy Iýsýf Tolbadan 6:4 esebimen basym túskenimen, ekinshi aınalymda ıtalııalyq Maýro Nespolıden 2:6 esebimen jeńildi.

Sý dobynan qatarynan ekin­shi kezdesýde jeńilis tapqan Qazaqstan quramasy endi jeńi­letin bolsa qol júkterin jınaı berýine bolady. Olar ekinshi kezdesýde Serbııadan 19:5 esebimen oısyraı jeńildi.

Sońǵy kezde boksty talan-tarajǵa salǵan AIBA-nyń Ha­lyqaralyq olımpıadalyq ko­mıtettiń aldynda bedeli qal­ma­ǵany belgili. Tipti boksty olım­pıadalyq sport túrinen alyp tastaý tóńireginde áńgime qoz­ǵalǵan-dy. Biraq áýpirimdep júrip tórt jylda bir keletin dodada qalǵan boksqa bul joly AIBA-nyń emes, HOK-tyń tóreshileri qazylyq etedi. Sol se­bepti barlyq jaýapkershilikti óz moıyndaryna alǵan HOK «Tokıo Olımpıadasynda boks ádil ótedi» degen bolatyn. Onyń ústine buǵan deıin rıngke kóte­rilgen úsh boks­shymyz da jarysty sátti bastady. Odan qalsa boks­tan álemdik derjavalardyń qata­ryndamyz degen senim de bar boıymyzda. Alaıda Kokugikan arenasyna kelgende senimimiz kúl-talqan boldy.

69 kıloda salmaqta synǵa túsken Abylaıhan Júsipov ja­rysqa ekinshi bolyp shyqty. Onyń aldynda London Olım­pıa­dasynyń chempıony, kýbalyq Ro­nıel Iglesıas Sotolongo ja­pon boksshysy Okazakamen ju­dyryqtasyp, ázer degende 3:2 ese­bimen jeńdi. Osyǵan qa­rap bizdiń Abylaıhan Ro­nıel Iglesıasti kelesi kezde­sýde sabaıdy ǵoı dep, jer­le­si­mizdi shırek fınalǵa aldyn ala shyǵaryp ta qoıǵan edik. Sengen Abylaıhanymyz Djonson Delantemen bolǵan kez­desýde sylbyr bokstasty. Nege ekeni belgisiz soqqylary dóp tıgenimen, onyń soqqysyn qarsylasy shybyn qurly kórmeıdi. Kezdesýde 1:4 esebi tirkeldi. AQSh ókiliniń paıdasyna.

Tórt Olımpıadada qazaq boks­shylary atoı salyp, «qazaq­tyń salmaǵy» atanyp ketken 69 kıloǵa degen «ıeligimizden» To­kıo tórinde aıyrylýǵa týra keldi. Ol endi kimge buıyrar eken?

Vasılıı Levıttiń judy­ryqtasýy tipti masqara boldy. To­­kıoda altyn alady-aý de­gen Va­­sıanyń dáýiri Rıoda-aq ótip­ ket­­ken eken. Olım­pıa­danyń kú­mis júldegeri Levıt Is­­panııa na­my­syn qor­ǵaıtyn ký­balyq Em­ma­nýel Reıes­ke qar­sy shyqty. Kez­desýdiń ekinshi raýnd­ynda jek­pe-jek merziminen buryn aıaq­taldy. Birneshe aýyr soqqyny ót­kizip alǵan Levıt alańda sulap tústi.

Tennısten Qazaqstan ko­man­dasynyń múshesi Mı­haıl Ký­kýsh­kın Tokıodaǵy jo­ryǵyn aıaqtady. Ol ekinshi aı­nalymda ATR reıtınginde 66-orynda turǵan Belarýs sport­shysy Ilıa Ivashkodan 1:2 esebimen je­ńilis tapty. Ekeý­ara 2 saǵat 25 mınýtqa so­zylǵan matchta 6:7, 6:3, 6:3 ese­bi tirkeldi.

Esesine Olımpıadada tennıs­shiler arasynda jalǵyz ózi qalǵan Elena Rybakına men jú­zýden el maqtanyshy Dmıtrıı Balandın úmit shoǵyn úrleı tústi. Rybakına úshinshi aınalymda horvatııalyq Donna Vekıchpen 1 saǵat 41 mınýtqa sozylǵan kezdesýde 7:6, 6:4 esebimen jeńiske jetti.

«Búgin óte qıyn kezdesý boldy. Jańbyrǵa baılanys­ty match keıinge shegerilip, kort­qa shyǵatyn kezegimdi uzaq kúttim. Qazirgi oıynyma kóńilim tolmaıdy. Sebebi kezdesý bas­tal­ǵanda kóptegen qatelikke jol berdim. Dese de, búgin je­ńiske jetip, kelesi aınalymǵa ót­kenime óte qýanyshtymyn. Ke­lesi qarsylasym – ıspanııalyq Gar­bıne Mýgýrýsa. Ol jaqsy ten­nısshi jáne maǵan onyń oıyny tanys, birge oınap kórdik. Sondyqtan alda meni ne kútip turǵanyn jaqsy bilemin», dedi Elena Rybakına.

Seısenbi kúngi jarysta soń­ǵy bolyp 200 metr­ge brass ádi­simen júzýden irik­teý týr­nıri ótti. Rıo Olımpıa­dasy­nyń chempıony Dmıtrıı Ba­landın óz tobynda tórtinshi nátıje tir­kedi. Al jalpy esep­te je­tin­shi orynmen Olım­pıa­danyń jar­tylaı fınalyna joldama aldy.

Sońǵy jańalyqtar

Aqtaýda er adam bıikten qulap mert boldy

Aımaqtar • Búgin, 10:53

Sport jańalyqtaryna sholý

Sport • Búgin, 09:11

Bárimiz bir aspannyń astyndamyz

О́ner • Búgin, 09:10

Sýretshiler úıi ashyldy

Aımaqtar • Búgin, 09:08

Bal bulaq bolyp aqty

Aımaqtar • Búgin, 09:07

Ońaılyqpen em qonbaıdy

Medısına • Búgin, 09:05

Uqsas jańalyqtar