Qysqasy, qazaq sportshylaryna jóndi júlde buıyrmaı, Tokıo Olımpıadasy túńildirip tur. Qolany qońyltaqsyp otyrǵan jaıymyz joq, dese de qansha qola bolsa da, onyń quny altyn túgil, kúmistiń shıregine kelmeıtini belgili. Túrikmenstan quramasynyń jalǵyz kúmis medalmen Qazaqstannan jeti saty joǵary ornalasqandyǵy – osynyń aıǵaǵy. «Qum jıylyp tas bolmas» demekshi, qanshama qola jınalǵanymen, onyń altynǵa jetpeıtini taǵy anyq. Endeshe, bizge altyn medal aýadaı qajet.
Buryn-sońdy Qazaqstan quramasy qatysqan Olımpıadalarynda eldiń Ánuranyn asqaqtata shyrqatyp keldi. Atlanta, Sıdneı, London, Rıo Olımpıadalarynda 3 altyn medaldyń arqasynda Ánuran úsh márteden shyrqaldy. Tek Beıjiń Olımpıadasynda ǵana 2 altynǵa ıe boldyq, 4 kúmis pen 7 qola medaldy aıtpaǵanda.
Ras, Tokıodaǵy túńildirgen sátti buryn da bir márte bastan keshken edik. Afına Olımpıadasynda. 2004 jyly. Bul jaǵdaı on alty jyldan keıin qaıtalanady dep kim oılaǵan?! Abyroı bolǵanda, Olımpıadanyń sońǵy jarys kúni boksshy Baqtııar Artaev jeńis tuǵyryna kóterilip, eldiń Ánurany Afınada da shyrqaldy. Sóıtip Qazaqstan 1 altyn, 4 kúmis, 3 qola enshilep, jalpy esepte 40-shy oryn alǵan edi.
Kún saıyn qazaqstandyq olımpıadashylar qatysatyn jarystardy Olımpıada qalashyǵynyń baspasóz ortalyǵynda kirpik qaqpaı qadaǵalap, qazaq jankúıerlerinen súıinshi suraıtyn sátti taǵatsyzdana kútip otyramyz. Qorjyndaryna qundy medaldar saýyldap túsip jatqan basqa elderdiń jýrnalısterine qyzyǵa qaraımyz. Al bizdiń sportshylardyń qarqyny kóńil kónshitpeıdi, úmit úzilgeli tur. Sózdiń qysqasy, osy Olımpıadada altyn alsaq (bar tileýimiz de osy) ta, almasaq (onyń betin ary qylsyn) ta, el sportynyń barlyq salasyn súzgiden ótkizip, sapa men sannyń arajigin ajyratatyn, sátsizdikterdiń syryn ashatyn bir tereń taldaý jasalýy qajet dep oılaımyz.
