«Atyraý-Inder» baǵytyndaǵy tas jolda apat jıi bolady. Osyǵan baılanysty oblystyq Polısııa departamentiniń ákimshilik polısııa basqarmasy júrgizýshilerdi jol-kólik apatynan saqtandyrýdyń ózgeshe tásilin qolǵa aldy. Polıseıler oblystyq Jolaýshylar kóligi jáne avtomobıl joldary basqarmasymen birge tas joldyń úı janýarlary kóp júretin sondaı-aq jol-kólik oqıǵasy bolýy múmkin qaýipti ýchaskelerge maketter ornatty. Maketterde polısııa kóligi men úı janýarlary beınelengen.
– Kólikterdiń jol boıynda júrgen iri qarany qaǵýy jıilep ketti. Máselen, 17 shildede «Atyraý-Oral» tas jolymen Almaly aýylyna qaraı qozǵalǵan «Vaz-21101» avtokóliginiń júrgizýshisi jol qaýipsizdigin saqtamaı, jol ústinde ketip bara jatqan túıeni qaǵyp ketken. Polısııa qyzmetkerleri oqıǵa ornynan ketip qalǵan 59 jastaǵy júrgizýshini anyqtady, – dep habarlady departamenttiń baspasóz qyzmeti.
Atyraý oblysy
