Baqtııar Baıseıitov: Jerlesterimnen keshirim suraımyn

– Komandamyzdyń kóshbasshysy Meırambek Aınaǵulov sportshylardan birinshi bolyp kilemge shyqqandyqtan psıhologııalyq turǵydan daıyn bolmaǵan sııaqty. Onyń qarsylasy solaqaı. Soǵan baılanysty ózimizge yńǵaıly bolatyndaı kúres stılin túsindirip, oǵan jetkizgenimizben, barlyǵy beker boldy. Tapsyrmamyzdy kilemge shyqqanda oryndaǵan joq. Sondaı bolmashy qateliktiń kesirinen komandamyzdyń kósh­basshysy qarsylasyna ese ji­berdi, – degen bas bapker Demeý Jadyraevtyń japon balýanynan qalaı jeńilgenin de aıtyp berdi. – Demeý upaı sanymen alda turǵan. 30 sekýndtyq úziliste basyn tómen qaratpaı, barlyq sátti baqylaýǵa alý keregin aıtyp, bárin túsindirgenbiz. Biraq Demeýdiń dál osylaı sońǵy sátte bolmashy ádiske túsip, qarsylasyna upaı syılaǵanyn biz de túsine almadyq, – dedi B.Baıseıitov.

Sondaı-aq Baqtııar Baǵasharuly 87 kıloda jarys jolyna shyqqan Nursultan Tursynovqa tóreshiler ádiletsizdik jasady deıdi.

– Tóreshiler tarapynan baǵalaý durys bolmady. Birinshi bolyp parterge bizdiń balýandy qoıdy. Ekinshisinde nemis balýany jatty. Sol kezde Nursultan tik turyp jartylaı ádis jasap laqtyrǵanymen, tóreshiler onyń eki upaıyn esepke almady. Ereje boıynsha tolyq jasalmaǵan ádiske eki upaı berilýi kerek. Men tóreshiler sheshimine shaǵym túsirgende (chellendj) beldesýdi qaıta qarap, sheshimdi ózgertken joq. Ádette shaǵym qana­ǵattandyrylmasa, qarsylasqa bir upaı beriledi. Bas tóreshi, tóreshiler úılestirýshiniń ulty – nemis. Osy jerden ózderińiz qorytyndy jasaı berseńizder bolady. Eger de eki upaıdy Nur­sul­tan­nyń enshisine jazǵanda, kelesi kezeńge óter edik. Bul jer­de jeńisti tartyp aldy dep esep­teımin, – dedi B.Baıseıitov.

О́z kezeginde grek-rım kúre­sinen álem chempıony Baqtııar Baı­seıitov elden keshirim surap, aldaǵy josparyn bólisti.

– Men 2019 jyldyń bel ortasynan quramanyń bas jat­tyq­tyrýshysy qyzmetine kiristim. Az ýaqyttyń ishinde balýandardy daıarlap, sol jyly Nur-Sultan qalasynda ótken álem chempıonatynda baq synadyq. Onda biz bir kúmis, eki qola medal jeńip aldyq. 2020 jyly Azııa chem­pıo­­natynda 1 altyn, 1 kúmis jáne 3 qola júldege ıe boldyq. Bı­ylǵy Azııa chempıonatynda 2 altyn, 2 kúmisti enshiledik. Soǵan qaramastan, Olımpıadada sátsiz óner kórsetip otyrmyz. Jeńilis úshin jerlesterimnen keshirim suraımyn. Olımpıada esebin elge barǵannan keıin tolyqqandy beretin bolamyz. Eger de barlyǵy durys bolsa, kúzde ótetin álem chempıonatyna daıyndyqty bastap ketýimiz kerek, – dedi bas bapker.