Bas bapker Baqtııar Baıseıitov komandanyń nátıjesin saraptap, sátsizdiktiń basty sebepterin jáne aldaǵy josparlaryn aıtty.
«Komandanyń Olımpıadadaǵy nátıjesine qandaı baǵa berýge bolady? Árıne, kórsetkish óte tómen. Biz qateliktermen naqty jumys isteımiz, óıtkeni, komandanyń kemshiligi kóp boldy. Biz bir nárseni túsindik. Sportshylarǵa fızıkalyq turǵydan ǵana emes, psıhologııalyq jaǵynan da kóp qoldaý qajet eken. Bapkerler tapsyrmasyn oryndaı almaǵan Meırambek Aınaǵulov týraly aıtalyq. Ol kilemge shyǵarda kózinde ot bolǵan joq. Sondyqtan, qandaı da bir nátıje shyǵara almady. Biz árbir sátti talqylap, strategııamyzdy federasııa jáne UOK-pen birlesip daıyndaımyz.
Jadyraev týraly aıtar bolsam, ol bárin jaqsy bastady. Kúshi de, baby da jaqsy bolǵan. El namysyn qorǵaýǵa tolyq daıyn edi. Biraq ekinshi kezeńde qate jibere bastady. Biz aıtqan keńesterdi múlde estigen joq. Beldesýdiń bitýine sońǵy sekýndtar qalyp, japondyq óz jeńilisin moıyndaı bastaǵanda qarsylasqa upaı berip qoıdy. Demeý de, basqalary da muny áli túsine alar emes. Biz de sol beldesýde keıin óz ózimizge kele almadyq.
Nursultan Tursynovqa keler boslam, men chellendj arqyly talap etken eki upaıdy alǵanda, jeńetin edik. Sol beldesýden ótip ketkende, ol jartylaı fınalǵa deıin jetýshi edi. Onyń ádisin baǵalamady, chellendj surasam da, bizge upaı bergen joq. Nursultanda da bári jaqsy boldy. Biraq tóreshiler sheshim kúmán týdyrady. Bul sport bolǵan soń, jeńistiń de, jeńilistiń de qatar júretini bar.
Biz bul oıynǵa uzaq daıyndaldyq. Jattyǵý jaqsy ótti, der kezinde ushyp kelip, klımatqa beıimdeldik. Bizge daıyndalý úshin eshteńe de kedergi bolǵan joq. Jigitter de babyna endi. Árıne, men olardan jaqsy nátıje kúttim. Biraq, bolary boldy. Dese de, qorytyndy esep dál osylaı bolady dep oılaǵan joqpyn. Osy oraıda, bizdiń ýaqytyly jattyǵý jıynyn ótkizýimige septigin tıgizip, qoldaý kórsetken Qazaqstan Ulttyq Olımpıadalyq komıtetine alǵysymdy aıtqym keledi. Federasııa ókilderi Dáýlet Turlyhanov pen Anatolıı Volohaǵa da kóp rahmet! Serik Jumashev, Grıgorıı Kamyshenko, Georgıı Sýrsýmııadan quralǵan bapkerler keńesine alǵysym zor.
Jedel jumys isteıtin komanda jetekshisi Abylaıhan Qylyshbaevqa, massajshy Álisher Kenjebaev pen dáriger Azamat Nurmatovtyń da eńbegi orasan. Olardyń barlyǵy osyndaı qıyn zamanda bizdiń Olımpıadaǵa alańsyz daıyndalýymyzǵa úlesin qosty.
Endi alǵa jańa maqsattar qoıamyz. Qyrkúıek aıynda álem chempıonaty kútip tur. Elge oralǵan soń taǵy da qateliktermen jumys istep, komandany álem birinshiligine daıyndaımyz. Alǵa basý kerek. El namysyn qorǵaý úshin qaıtadan jańa kúshpen kelemiz. Árıne, komandamen birge lısenzııa ıelenip, úzdikter arasynda synǵa túskenimizge qýanyshtymyn. О́kinetin tustarym da kóp. Biraq dál qazir eshteńe ózgerte almaımyz. Jigittermen birge jankúıerlerdi aldaǵy jarystarda qýantýǵa tyrysamyz.
Qazirgi nátıjeni aıta kele, eshkimdi de kinalaǵym kelmeıdi. Bul jerde júıe kináli. Bizde tájirıbesi az jastar kóp. Solardy iske qosatyn ýaqyt keldi. Endi jastardy baqylaımyz. Olardy jattyǵý jıynyna burynǵydaı jıi shaqyratyn bolamyz. Koronavırýsqa baılanysty biz báriniń basyn qosyp, jattyǵý ótkize almadyq. Osy olqylyqty retteý qajet. Jastar tájirıbeli sportshylarǵa báselestik tanytýy úshin jumys isteımiz. Bizge talanatty jastardy tabý kerek. 2016 jyly jastar arasyndaǵy álemdik synda Temirlan Shadýkaev qana júlde aldy. Sodan beri tynyshtyq, topty buzyp-jaryp kele jatqan jas joqtyń qasy. Azııada ózin jaqsy kórsetken Sultan Ásetuly bar. Sol sekildi jastardy qatarǵa qosýymyz kerek. Bári alda. Biz eńsemizdi túsirmeı, odan ári damý úshin kúsh salamyz. Bul Olımpıada sátsiz bolsa da, bizdi jańa jetistikter, jańa jarystar kútip tur. Sol syndarǵa daıyndalamyz», - deıdi bas bapker.
